Ji welatparêzên naskirî yên Kobanê Şêx Ehmed Hemo ji ANF’ê re axivî û diyar kir ku gelek caran xwestine gel û Rêber Apo ji hevdû qut bikin, lê nekarîne.
Şêx Ehmed Hemo anî ziman ku desthilatdariyê nedihişt her tişt li wan qedexe kiribû û wiha got: “Dema ku me tevgera azadiyê û fikir û felsefeya Rêber Apo nas kir, wê demê ez fikirîm ku divê em ji bo azadiyê li hember desthilatdariyê têkoşîn bikin. Di meha Tîrmehê gelek rojên me yên dîrokî hene, ji bo Rojavayê Kurdistan û bi taybet ji bo Kobanê rojên dîrokî ne.
Zindana Amedê vejînbûneke nû bû. Di 2’yê Tîrmeha 1979’an de Rêber Apo derbasî Kobanê ya li Rojavayê Kurdistanê bû. Di 14’ê Tîrmeha 1982’yan de berxwedaneke dîrokî li hemberî faşîzma Tirk destpê kir. Faşîzmê tehemûlê vê berxwedanê nekir û em xistin zindanê, bi zindanan tu carî vîn û hêza mirovan lewaz nabe. Di hundirê zindanê de jî tenê berxwedan û têkoşîn dimîne. Ev hêz ji raman û felsefeya Rêber Apo hatiye girtin. Ji ber vê yekê wê tevgera azadiyê her tim bi serbikeve û wê dijmin têk biçe.”
Şêx Ehmed Hemo ragihand ku çareseriya tevahî aloziyên li cîhanê, tenê li Îmraliyê ye û wiha bilêv kir: “Tevgera Azadiya Kurdistanê li her çar parçeyên Kurdistanê belav bû û Kurd ji xewa giran şiyar kir. Bi destê dewletên hegemon dest bi komployê hate kirin, bi wê komployê xwestin Rêber Apo û gel ji hevdû qut bikin, xwestin vê tevgerê bi girtina Rêber Apo îmha bikin. Li dijî vê yekê bi milyonan kes li her çar parçeyên Kurdistanê rabûn. Ji wê demê û heta niha Îmralî bûye cihê çareseriyê. Hemû pirsgirêkên li cîhanê wê bi destê Rêber Apo bên çareskirin. Bêyî Rêber Apo tu azadî, aramî, aştî û demokrasî tune ye.
Armanca dewleta Tirk ew e ku gelê welatparêz û azadîxwaz ji fikir û felsefeya Rêber Apo qut bike. Em xwe li ser pradîgmaya Rêber Apo perwerde dikin û zarok bi vê paradîgmayê fêrî azadiyê dibin. Em xwedî wê hêza herî xurt in û tu carî kes nikare hêza me lewaz bike. Ji ber ku em xwe li ser parêznameyên Rêbertî, ji xwe re bingeheke demokratîk ava dikin.
Min Rêber Apo di 17’ê Gulana 1995’an de dît. Ji bo min şansekî dîrokî bû. Em wek malbateke şehîdan û malbateke welatparêz, li ser fikir û felsefeya Rêber Apo mezin bûn, em ê heta dawiyê li ser vê fikra demokratîk û azadîxwaz bijîn. Temenê Rêbertî niha 76 salî ye, ev 27 sal in li girtîgeha Îmraliyê tê ragirtin. Dewleta Tirk hemû zagon û qanûnên navneteweyî binpê dike û mafê hêviyê pêk nayîne.”
Şêx Hemo di dawiyê de wiha got: “Ji bo aştî, aramî, wekhevî, edalet, demokrasî û azadî li tevahî cîhanê pêk were, divê Rêber Apo êdî ji zindanê derkeve. Em bang li kesên welatparêz, rewşenbîr û azadîxwaz ên li Tirkiyê dikin ku em bi hev re li welatekî di nava aştiyê de jiyan bikin û azadiya fîzîkî ya Rêber Apo misoger bikin.”
