Bi sedan şêniyên kantona Firatê, endamên saziyên sivîl, Rêveberiya Xweser û partiyên siyasî cenazeyê şervanê Hêzên Komandos Rêdûr (Mihemed Mamed) ku di 29’ê Çileya 2025’an de li Dêr Hafir şehîd bûbû, îro bi merasîmeke biheybet li Pakrewangeha Şehîd Dîcle spart axê.
Di merasîmê de Rêveberiya Meclisa Jinan a Partiya Yekitiya Demokratîk (PYD) a kantona Firatê Bedîa Miho sersaxî ji malbata şehîd Rêdûr Helinc re xwest û soza şopandina rêya şehîdan da.
Bedîa Miho diyar kir ku wê dijmin tu carî nikaribe hêza wan lawaz bike û got: “Em tu carî serê xwe ji dijmin re natewînin. Em ê tola şehîdên xwe ji dijmin hilînin.”
Bedîa da zanî ku dilê şehîd Rêdûr ji bo azadiyê û wekheviyê lê dida û her tim di nava têkoşînê de bû û got, dê heta dawiyê şopdarên rêya şehîdan bin.
Rêveberê Meclisa Leşkerî ya bajarê Kobanê Îsmaîl Îsmaîl diyar kir ku ew ê planên dewleta Tirk a dagirker û hevalbendên wî vala derxînin û wiha anî ziman: “Şehîd Rêdûr li Kobanê û Dêrazorê û Dêr Hafirê her tim di nava berxwedan û têkoşîn de bû. Şehîd Rêdûr kêlî bi kêlî li kêlek hevalên xwe bûn û tu carî hevalên xwe bi tenê nedihişt, ji bo axa xwe her tim di nava têkoşînê de bû. Divê em jî şopdarên rêya şehîdên xwe bin heya êrişên dagirkeriyê têk bibin.”
Xwişka Şehîd Rêdûr Merdiya Mamed ev tişt anî ziman: “Birayê min her tim ji bo parastina ax û gelê xwe di nava têkoşînê de bû. Birayê min bi lehengî û wêrekiya xwe dihat naskirin. Ez bi şehadeta birayê xwe serbilind im.”
Pişte wesîqeya şehîd Rêdûr Helinc hat xwendin û radestî malbata wî hate kirin.
Cenazeyê şehîd Rêdûr bi dirûşma “Şehîd namirin” spartin axê.
