Çeteyên artêşa Tirk a dagirker bi hêzeke mezin a teknîkî û bi piştgiriya bi dehan wesayitên zirxî êrîşî eniyên şervanan kirin. Di van êrîşan de bi sedan çeteyên ji Tirkistan, Çeçenistan û bermahiyên DAÎŞ’ê hatin bikaranîn. Di heman demê de bi koordînasyona balafirên bêmirov ên bombebarkirî êrîşên hewayî li ser eniyên şervanan hatin kirin. Li gel vê yekê jî şervanan berxwedaneke xurt nîşan dan û êrîşên çeteyên artêşa Tirk a dagirker şikandin.
Li qadên şer, di navbera hêzan de cudahiyeke cidî heye. Li hembebrî çeteyên artêşa Tirk a dagirker û hêza wan a teknolojiya modern, şervanên QSD-YPJ’ê bi yekîneyeke bi tenê yan jî çend yekîneyên biçûk bersivê didin. Li aliyekî çeteyên bijarte yên DAÎŞ’ê, yên ji Tirkistan û Çeçenistanê, komên SMO û hêza bi teknolojiya modern, li aliyê din jî yekîneyên biçûk ên QSD-YPJ’ê. Şervan di nava her şert û mercî de, her wiha bi yekîneya hewayî ya Şehîd Harûn li ber xwe didin. Şervan bi vî rengî bersivê didin êrîşan û xwe diparêzin. Lê belê li gel vê yekê jî artêşa Tirk a dagirker û çeteyên wê bi hêza heyî re nikarin encamê bi dest bixin û li Tişrînê bi gavekê jî nikarin bi pêş ve biçin.
SERKETINA TAKTÎKÎ
Di vir de bêguman rola sereke û girîngî performans û stratejiya şer a şervanên QSD-YPJ û Melcîsa Leşkerî ya Minbicê ye. Baş e, ev stratejî çi ye? Em niha qala vê bikin. Şervanên QSD-YPJ’ê û Meclîsa Leşkerî ya Minbicê li qada şer û di şer de bi ahengiyeke mezin tevdigerin û xwe bi rêxistin dikin. Tunelên binê erdê û xetên parastinê yên li qadê bi rengekî profesyonel bi kar tînin û ev yek jî avantajeke cidî dide şervanan. Bi saya van taktîkan artêşa Tirk a dagirker û çeteyên wê nizanin bê şervanên QSD û YPJ’ê ji ku êrîş dikin û nikarin êrîşên dijber bikin. Çeteyên dewleta Tirk a dagirker li pêşberî van rêbazên parastinê dikevin nava panîkê û ji hev belav dibin. Ev yek jî serketineke taktîkî ya mezin dide şervanên QSD û YPJ’ê.
BERXWEDANÊ TIRSEKE MEZIN BERDA NAVA DIJMIN
Berxwedêrên Tişrînê ji her alî ve serketinê bi dest dixin. Di vir de rola esasî di stratejiya parastinê ya binê erdê û dîsîplîna li ser erdê de ye. Şervan hem di şerê tunelan de hem jî li ser rûyê erdê parastineke bi bandor dikin û asta xwe xurt dikin. Bi hunera xwe ya veşartin û liv û tevgerê, bi koordîne û dîsîplîna şervanan tirseke mezin dikeve nava dijmin. Bi vî rengî çeteyên dewleta Tirk a dagirker hewl bidin xwe nêzî xeta parastinê bikin jî her carê hewldana wan ji aliyê şervanan ve tê şikandin. Bi taybetî rojên dawî çeteyên dijmin bi rêya wesayitên zirxî hewl dan rê bigirin û bi pêş ve biçin, lê di encama berxwedana QSD û YPJ’ê de neçar man xwe vekişînin. Li her eniyeke li Tişrînê wesayit û baregehên çeteyên dijmin hene ku hatine îmhakirin.
PÊNGAVÊN STRATEJÎK ÊN LI DIJÎ ÊRÎŞAN
Şervanên li berxwedana Tişrînê, li xeta parastinê ya QSD û YPJ’ê li hemberî êrîşên çeteyên dijmin bi nepenîtî û amadekariyeke bêhempa tevdigerin. Şervan li gundan, bajarokan an jî li ser rê ji bo ji aliyê dijmin ve neyên dîtin bi her awayî tedbîran werdigirin. Dema ku çete hewl didin êrîşî xetên parastinê bikin, neçar dimînin xwe vekişînin û li her kolanan cenazeyên çeteyan li gel çekên wan hene.
Ev taktîka taybet dike ku dijmin di her pêngavê de têk biçe û timî xwe vekişîne. Şervan ne tenê parastinê, her wiha li hemberî her êrîşekê pêngavên stratejîk jî dikin û dijmin gav bi gav bê bandor dikin. Ev serketin ne tenê encama bûyerekê ye; her serketin bi rengekî kolektîf bi dest dikeve. Lewma ev serketin encama serketina hevpar a li qadên cuda ye.
