Partiya Wekhevî û Demokrasiyê ya Gelan (DEM Partî) ji bo nîqaşên li ser peyamên Rêber Apo, xebata “Çalakiyên aştiya civakî û azadiyê” dabû destpêkirin. Di çarçoveya xebatê de li Şaxa Petrol-Îş’ê ya Êlihê bi gel re civîn tê lidarxistin. Hevseroka Giştî ya Partiya Herêmên Demokratîk (DBP) Çîgdem Kiliçgun Uçar, nûnertên rêxistinên civaka sivîl û partiyên siyasî tevlî bûn.
Çîgdem Kiliçgun Uçar di civînê de got ku ew dixwazin geşedanên heyî bi gel re nîqaş bikin û bi hev re biryarê bidin. Çîgdem Kiliçgun Uçar, wiha got: “Li her derê Kurdan ji xwe re nasnameyeke serbixwe ava kirin. Di Plana Islehkirina Şerqê de hebûn, nasname û zimanê Kurdan hatibû qedexekirin. Ev qedexe hêj îro jî didomin. Me tu yek ji wan qebûl nekir. Em dizanin ku di serdema nû de bi tenê nînin. Li Rojhilata Navîn dîzayneke nû heye û bandorê li Tirkiyeyê jî dikin. Piraniya hêzan xwe ji Sûriyeyê vekişandin. Tenê Kurd li wir man. Jinan li Rojava şoreşek pêk anîn. Ew şoreş hêj jî li cîhanê deng vedide. Hûn nikarin li rexekî bibêjin ‘aştiya civakî’ û li rexa din amadekariyên êrişa ser Rojava bikin. Nexwe dê ev nîqaşên we vala derkevin.”
Bi domdarî Çîgdem Kiliçgun Uçar anî ziman ku li ser çareseriya pirsgirêkeke sedsalî tê axaftin û wiha pê de çû: “Di vê çareseriyê de birêz Ocalan weke aktorê dîrokî tê qebûlkirin. Em jî qebûl nakin ku birêz Ocalan li Îmraliyê be. Divê birêz Ocalan li gel avadanî, rêxistin û girseya xwe re be. 26 sal in di tecrîdê de tê ragirtin lê ji bo demokrasiya Tirkiyeyê têdikoşe. Çareseriya demokratîk a ku em dixwazin li Tirkiyeyê pêk bînin, ne ji bo xurtkirina îktîdarê ye. Berevajî vê, ji bo wekhevî û azadiya gelên Tirkiyeyê ye.
Di avakirina welêt de ked û îradeya gelê Kurd hebû. Encama vê kedê jî divê hemwelatiya wekhev be. Di pêvajoyeke ku nîqaşên çareseriyê tên kirin de çima dewlet ji bo aştiya navxweyî li bendê ye ku tenê aliyê din gavan biavêje? Çima her tiştî girêdayî banga birêz Ocalan dikin. Divê her du alî jî kedê bidin. Divê her du alî jî gavan biavêjin. Nexwe dê tu wateya wê nemîne. Dewlet û îktîdar heke jidil be divê gavan biavêje. Divê dewlet êdî hin tiştan bibêje û gavan biavêje. Biqasî îktîdarê, ewqas jî berpirsyartiya muxalefetê û derdorên civakî jî heye. Girîng e ku her kes xwedî li vê pêvajoya nû ku hêj nav lê nehatiye kirin derkeve.”
Civîn, piştre ji çapemeniyê re girtî domiya.
