Li herêma Ereban a Şengalê, gelê Ereb ê herêmê daxuyaniyek da. Di daxuyaniyê de komkujiya sala 2014’an a li dijî Êzidiyan hate şermezarkirin û piştevaniya gel ji civaka Êzidî re hate nîşandan. Daxuyanî ji aliyê endamê rêveberiya meclisa herêman Ereban, Meşel El-Raşidî ve hat xwendin.
Di daxuyaniyê de, El-Raşidî qala hovîtiya fermanê kir ku ji aliyê çeteyên DAÎŞ’ê ve hatibû kirin û bû sedema perçebûna civaka Êzidî, koçberkirina bi hezaran kesî û hewldana tunekirina nasnameya wan a çandî û olî. Di daxuyaniyê de bêdengiya navneteweyî ya ji wê demê heya niha bi tundî hate şermezarkirin û hate diyarkirin ku ev bêdengî mîna pejirandina vê fermanê ye .
El-Raşidî di berdewamiya daxuyaniya xwe de anî ziman ku gelê Ereb ê Şengalê dengê xwe bilind dike û vê tawanê li dijî mirovahiyê şermezar dike û piştgiriya xwe ya bi gelê Êzidî re dubare bike û got, “Yên ku di dîrokê de rastî 74 hewldanên qirkirinê hatine, hîn jî bi gefên berdewam ên li ser yekîtiya civakî û hebûna xwe re rû bi rû ne.”
Di dawiya daxuyaniyê de, El-Raşidî banga yekîtiyê û bîranîna qurbaniyan kir û destnîşan kir ku erka exlaqî û neteweyî ye ku ev tawan neyê jibîrkirin û her kes beşdarî hewldanên ji bo pêkanîna edaletê û naskirina vê fermanê wek jenosît bibe.
