Serokê Komeleya Şêx Seîd û Hevalên wî yên Dozê M Kasim Firat anî ziman ku êrişên hikumeta veguhêz a Şamê ya li gel komên radîkal ên li ser warê Kurdan ê li Rojava û Helebê weke siyaseteke ji bo tasfiyekirina destketiyên Kurdan pênase kir û diyar kir ku ev yek ji aliyê yekîtî û refleksa hevpar a gelê Kurd pêvajoyeke diyarker e.
Firat got, “Kurd li Helebê hatin qetilkirin, ji warê xwe têne kirin. Lanet be li van zaliman. Lê belê ev êriş nikare hêviya gelê me bişikîne, nikare wan ji rêya azadiyê vegerîne. Kurd êdî ne weke berê ne; Kurd xwedî zemîneke polîtîk e û bi rengekî stratejîk tevdigerin. Li hemberî vê hovîtiya li Helebê qewimî Kurd li çar aliyên cîhanê bûn yek. Ev helwesta me ya hevpar, hêviya me ye.”
Firat êrişên Hikumeta Veguhêz a Şamê ya li ser Rojava nirxand û anî ziman ku Tirkiye û hin dewlet piştgiriyê didin van êrişan, êriş plan kirin û di nav de cih girtin.
Firat got, “Di rewşa heyî de ji bo gelê Kurd dixwazim vê bibêjim: Ev êriş me bêhêvî nakin; ji ber ku gelê Kurd ew gel e ku êş kişandiye, hatiye girtin, li çiyê têkoşiya ye û sirgûn bûye. Ev gel li hemberî êrişên navborî êdî polîtîk û stratejîk difikire, li gorî wê gavê diavêje. Ev yek ji bo paşerojê hêviyê dide min. Ev êriş me digihîne hev, yekîtiya me ava dike. Kurd di nava yekîtiyê de li hemberî van êrişan tevdigerin. Li hemberî êrişên li Helebê partiyên Kurd ên li Bakur, Başûr û deverên din bûn xwedî helwesteke hevpar.”
Firat avêtina cenazeyê berxwedêreke jin a Kurd li Helebê weke barbariyê pênase kir û got, “Hovîtiyeke bi vî rengî derbek e ku li dijî rûmeta mirovahiyê hatiye xistin. Ev barbarî û zalimtiya li dijî mirovahiyê tenê dikare hêrs û biryardariya gelê me zêde bike. Berxwedêreke jin a Kurd mala xwe, taxa xwe, jiyana xwe parast. Bêhurmetiya li cenazeyê jineke xwedî vê helwesta bi rûmet, li dijî Kurdan û mirovahiyê hatiye kirin. Kurd li hemberî vê yekê bûn yek. Em êdî ne tenê ew gel in ku êşê dikişînin. Em xwedî rastiya gelekî ne ku bîreke xwe ya dîrokî û hişmendiyeke xwe ya polîtîk heye û li gorî wê tevdigere. Ev rastî nayê têkbirin. Yên ku sedan salan li hemberî vê rastiyê şer kirin, têk çûn. Kurdan ti carî dest jê bernedan.
Îro li Helebê, li Rojava, li Rojhilat li çar parçeyan ji bo yek armanc û yek hêviyê em li ser piyan e. Her komkujî, her sirgûn, her êriş hîn bêhtir me nêzî hev dike, girîngiya yekîtiyê tîne bîra me. Paşeroja gelê Kurd wê bi vê yekîtiyê ava bibe. Ez qet bêhêvî nînim; dibe ku êriş û komkujî zêde bibin, lê belê rastiya gelê Kurd wê bi ser bikeve ku bi sedan sal in li ber xwe dide. Li Rojava ya ku êriş li dijî wê hate kirin îradeya gel e û nikarin vê îradeyê bişikînin. Çar parçe li dora vê îradeyê bû yek.”
