Seroka Yekîtiya Jinên Suryan a Sûriyeyê Corcêt Barsom derbarê êrîşên li ser Rojavayê Kurdistanê û berxwedana gel a li hemberî çeteyan de axivî. Corcêt Barsom diyar kir ku Sûriye di pêvajoyeke hesas re derbas dibe û wiha got, ‘’Em weke gele Sûriyeyê îro di pêvajoyeke dîrokî û hesas re derbas dibin, gelek geşedanên siyasî, mirovî, ewlehî hene. Her wiha êrîşên ku rojane tên kirin tenê li ser pêkhateyekî nayê kirin, li ser hemû gelên Sûriyeyê bandor dike û bi taybet jî herî zêde li ser pêkhateyên ku dîrokê de rastî qirkirin û tunekirinê hatine bandor dike.”
Di berdewamiya axaftina xwe de Barsom eşkere kir ku eger ev bê aramî berdewam bike wê bi xwe re gelek xeteriyan ji bo pêkhateyên Sûriyeyê bîne û wiha pê de çû, ‘’Berdewamiya rewşa bê aramiyê pêkhateyên Sûriyeyê bi xeteriyên mezin ên ewlehî, nasname û tevlîbûna rast di pêşeroja welat rû bi rû dihêle. Pêwîstî bi çareseriyeke bi lez a maf, wekhevî û rûmeta hemû pêkhateyan heye. Divê em neçin ber bi rêbazên leşkerî. Ji ber ku ev yek wê bi xwe re xerakirin, qetilkirin û şerê birakujiyê bîne.”
‘CIVAK DIKARE XWTA XWE YA PARASTINÊ AVA BIKE’
Corcêt Barsom di nav axaftina xwe de da xuyakirin ku rewşa ku îro gelê Sûriyeyê dijî encama siyasetên ku civakê hedef digire ye û wiha domand, ‘’Herêma Cizîrê weke mozayîkeke dîrokî ye ku di nav xwe de hemû pêkhate, ol, bawerî û çandan dihewîne. Bûyerên ku îro diqewimin çavkaniya xwe ji fîtneyên di nav pêkhateyan de digire. Em bawer dikin ku girêdana pêkhateyan bi hev re ji hemû xîtabên parçekirinê bi hêztir e û civak di wê zanebûnê de ye ku dikare li hember hewldanên bi vê awayî xeta xwe ya parastinê ava bike’’
REWŞA NIHA BANDORÊ LI SER HEMÛ JINÊN SÛRIYEYÊ DIKE
Corcêt di nav axaftina xwe de qala zehmetî û xeteriyên ku jinên Sûriyeyê pê re rû bi rû dimînin, kir û wiha got, “Hemû jinên ji pêkhateyên Sûriyeyê ji tundî û kiriyarên zagonî û heta bi zext û kevneşopî û zihniyeta zilamperestiyê, rastî zehmetî û xeteriyên mezin tên. Jinên Suryan û yên pêkhateyên din jî para xwe ji vê digirin û herî zêde bandor dibin. Ji ber ku ew jî ji pêkhateya ku temsîla wan lawaz tê kirin û xeteriya li ser rola jin a di nav civakê de bi xwe re tîne. Ji ber vê divê tevgereke cidî hebe ku di zagonan de parastina maf, çand û rûmeta jinê bike. Ev jî divê bi rêya destûreke ne navendî û mafê welatîbûyînê de pêk were.”
Seroka Yekîtiya Jinên Suryan a Sûriyeyê Corcêt Barsom anî ziman ku divê bi rêya diyalogê rê li pêş fitneyên tên kirin were girtin û wiha dawî li axaftina xwe anî: “Divê bi rêya diyalog, rêzdayîn rê li pêş fitneyan were girtin. Her wiha divê herkes di belavkirina zanebûn û hişyarîkirina civakê de roleke erênî bigire ser xwe. Belavkirina çanda welatparêzî û hebûna destûreke ku mafê hemû pêkhateyan digire nav xwe wê ji bo aştiyê bibe bingehek.”
