‘Komîsyona Demokrasî, Xwişk-Biratî û Piştevaniya Mîllî’ ku ji bo çareseriya pirsgirêka Kurd li Meclîsê ava bûye, wê li malbatên mexdûrên şer guhdarî bike. Dayikên Şemiyê, Dayikên Aştiyê û nûnerên rêxistinên mafên mirovan ên cuda wê beşdarî civînên komîsyonê bibin û têkildarî pêvajoyê nirxandinan bikin.
Ji Dayikên Aştiyê Turkan Dûrç anî ziman ku êşên hatine kişandin tenê bi demokrasiyê dikarin bi dawî bibin û diyar kir ku dayik hemû xwedî heman êşê ne, lê belê ji ber polîtîkayên astengiyê û cihêkar ên dewletê lêgerîna li mafê xwe zehmet bûye.
Turkan Dûrç biryardariya xwe ya li ser mijara aştiyê destnîşan kir û bang li Komîsyona Demokrasî, Xwişk-Biratî û Piştevaniya Mîllî, her wiha bang li rayedaran kir û got, “Ez dixwazim Rêber Apo û gerîlayên ku çek danîne beşdarî pêvajoya siyasî bêne kirin.”
Turkan Dûrç anî ziman ku daxwaza wan tenê aştî ye û bi vî rengî dewam kir: “Di nava vê civakê de gel hebûn ku tine dihatin hesibandin; Kurd, Suryan, Ereb, Êzidî… Ti ji wan li ser vê xakê nedihatin qebûlkirin. Gelekî xwîn dihate rijandin û zarokên me neçar man ku tevlî nava têkoşînê bibin. Yek ji zarokên min girtî ye, yek jî li nava têkoşîna azadiyê ye. Em gelek in ku li ser vê xakê xwedî maf in. Em gelek in ku ziman, çand û dewlemendiya me heye. Em dixwazin hebûna me êdî li ser vê xakê bê qebûlkirin.”
‘HER TIM RÊYA ME TÊ GIRTIN’
Turkan Dûrç got, “Gel bawer dike ku dayik wê aştiyê bînin” û diyar kir ku wan heta niha ji dewletê gaveke erênî nedîtine û got, “Di daxuyaniyên çapemeniyê de, yan jî di dema çûyîna hevdîtina li girtîgehê rêya me tê birîn. Bi gotina ‘Ev dayikên aştiyê ne’ ti carî rêya me venekirin. Li gel ku em dilxwazên aştiyê ne, li gel ku em naxwazin leşker jî polîs jî zarokên me jî bimirin; li gel ku em dayik in her tim rêya me digirin. Dema ku ji bo bihîstina dengê xwe diaxivin jî gelek dayikên me hatin binçavkirin û gelek ji wan hatin girtin. Her tim li pêşiya me bûn asteng û hewl dan ku em daxwazên xwe nînin ziman. Xwestin gotina ‘Bila kurd-Tirk bi hev re bin’ jî asteng bikin.”
‘RONDIKÊN ÇAVAN ÊN DAYIKAN HEMÛYAN WEKE HEV IN’
Turkan Dûrç destnîşan kir ku komîsyona li meclîsê hatiye avakirin divê her kesî hembêz bike û got, “Em dixwazin ev komîsyon berfireh be. Hemû renk, dayik hemû di nav de bin; bi taybetî jî em dixwazin Dayikên Aştiyê di nav de bin. Çi tiştekî xweş e, bi navê xwişk û biratiyê komîsyonek hate avakirin. Em gavên yekser ji vê komîsyonê hêvî dikin. Em naxwazin li ser kaxizê bimîne. Ji bo ev komîsyon bi rengekî rast bixebite divê her kes li hev kom bibe. Dayikên Aştiyê, dayikên şehîdan, dayikên yên li çiyê û leşkeran di nava vê komîsyonê de bin. Ew jî ew dayik in ku mîna wan kezeba wan şewitî ye. Rondikên çavan ên dayikan hemûyan weke hev in. Em gelekî dixwazin bi hev re bin û ji vê komîsyonê re bibin alîkar.”
‘BILA RÊBERTÎ LI MECLÎSÊ SIYASETÊ BIKE’
Dayika Aştiyê Turkan Dûrç anî ziman ku daxwazên wan ji Devlet Bahçelî û Tayyîp Erdogan jî hene, divê xwedî li aştiyê derkevin, gavê biavêjin û got, “Dayikên ku zarokên xwe ji dest dane her sal li kolanan û her Şemiyê dengê xwe bi xurtî bilind dikin. Ew malbat li hestiyên zarokên xwe digerin; divê êdî vê daxwaza wan bi cih bînin. Her wiha em li bendê ne ku Devlet Bahçelî gotina xwe bi cih bîne. Em dixwazin Rêbertî li Meclîsê siyasetê bike û tavilê bê berdan.”
‘ŞEWITANDINA ÇEKAN Û DANÎNA ÇEKAN WEKE HEV NÎNE’
Turkan Dûrç xwest, zarokên wan ên ku çek danîn tevlî siyasetê bibin û got, “Em çûn başûr, me şahidî ji rojeke dîrokî re kir. Şewitandina çekan ji aliyekî ve em kêfxweş kir, lê li aliyê din em ketin nava fikaran. Rêbertî gelek caran ji bo aştiyê çek rawestand û komên aştiyê bi gel re civiyan. Lê belê ji ber ku aştî pêk nehat, em xemgîn bûn. Em hêvî dikin ku vê carê bi rastî jî aştî pêk were. Şewitandina çekan û danîna çekan weke hev nîne. Şewitandin tê wê wateyê ku wê careke din çekê bi kar nîne. Em jî dixwazin ku dewlet vê bibîne û tavilê gavê biavêje. Em dixwazin hevalên ku çek danîne hemû, zarokên me tevlî siyasetê bibin.”
