Di daxuaniya Meclîsa Jinan a DEM Partiyê de hate gotin, “Li Îranê, rejîma Molla ya faşîst cezayê darvekirinê li parêzvana mafên karkeran û jinan Şerîfe Mûhammedî birî û ev ceza hate erêkirin. Li dijî cezayê darvekirinê yê hatiye erêkirin, em serî hildidin.”
Daxuyaniyê bi vî rengî dewam kir: “Li kîjan devera cîhanê dibe bila bibe, em her êrîşeke li dijî jinan weke êrîşa li hemberî bedena xwe dibînin û serhildana xwe ya li hemberî vê yekê mezin dikin. Rejîma Molla ya faşîst ku êrîşî jiyan û berxwedana jinan dike, ji bo karibe desthilatdariya xwe ya bi serweriya mêr dewam bike, careke din li hemberî mirovahiyê û jinan sûc kiriye.
Şerîfe Mûhammedî li hemberî binpêkirina maf, tundî, mêtingerî û bêedaletiyê têkoşiya. Cezayê darvekirinê yê ku li Şerîfe Mûhammedî hate birîn ne encama sîstemeke hiqûqê ya li ser bingeha maf e, lê belê berhemeke wê sîstemê ye ku xwe ji serweriya mêr xwedî dike û êrîşî mafê jiyanê yê jinan dike. Bi sedan jinên ku ji bo azadiya jinan têkoşiyan bûn hedefa vê rejîma dijminê jinan. Li hemberî van sîstemên ku her gava tengav bû çoyê dadgeriyê bi kar anî û xwe li pişt hiqûqa mêr veşartî, em bêdeng neman, em ê bêdeng nemînin!
Şerîfe Mûhammedî ji ber ku mafên jinan û karkeran diparast bi sûcdariya ‘Li hemberî dewletê propaganda reşkirinê meşand’ bi cezayê darvekirinê hate cezakirin. Em deng, nefes û îsyana Şerîfe Mûhammedî ne! Darizandina wê nîşan dide ku mêtingerî û tundiya li dijî jinê ya li Îranê bi destê ‘hiqûqê’ tê rewakirin.
Em bang li jinan hemûyan dikin;
Li hemberî erêkirina cezayê darvekirinê yê li Şerîfe Mûhammedî hatiye birîn, bi gotina ‘Her tayê porê Jîna Mahsa Amînî îsyana me ye’ piştevaniyê mezin bikin. Mezinkirina vê piştevaniyê tê wateya mezinkirina têkşoîna me ya azadî û wekheviyê ya li her cografyayê li dijî sîstema bi serweriya mêr tê meşandin. Li dijî tundî û mêtingeriyê em ê jiyana xwe û keda xwe biparêzin û jiyaneke azad û wekhev ava bikin. Bi baweriya xwe, bi biryardariya xwe, bi dirûşma xwe ya ‘Jin, Jiyan, Azadî’ em ê bibin deng û nefesa Şerîfe Mûhammedî!”
