Li gorî medya Iraqê, tîmên edlî yên taybet ên bajarê Mûsilê vê sibehê dest bi kar kirin û li Goristana Hasfayê goreke komî ya mezin derxistin holê. Tê gotin, gora komî dibe ku yek ji gorên komî yên herî mezin be ku heta niha hatine tespîtkirin.
Rayedar dibêjin, hestiyên hatin dîtin dibe ku yên sivîlên Êzidî bin ku sala 2014’an li Şengalê û derdora wê ji aliyê DAÎŞ’ê ve hatin qetilkirin. Hestiyên ku hatin dîtin, ji bo tespîtkirina nasnameya wan, wê ji Saziya Tipa Edlî ya li Bexdayê re bêne şandin.
DELÎLA QIRKIRINA ÊZIDIYAN CAREKE DIN DERKETE HOLÊ
Ev gora komî ya nû hate tespîtkirin, weke delîleke din a şênber e ku nîşan dide, di sala 2014’an de DAÎŞ’ê civaka Êzidî qir kir. DAÎŞ’ê di 3’ê Tebaxa 2014’an de êrîş bir ser herêma Şengalê, bi hezaran mêr ên Êzidî bi rêk û pêk înfaz kir, jin û zarok kir kole û di nava şert û mercên li derveyî mirovahiyê dîl girt.
Di van êrîşan de ku ji aliyê Neteweyên Yekbûyî, Parlamenta Ewropayê û gelek rêxistinên mafên mirovan ve weke ‘qirkirinê’ têne qebûlkirin, herî kêm 5 hezar Êzidî hatin kuştin, nêzî 7 hezar jin û zarok hatin revandin.
LI IRAQÊ HÎN JÎ BI DEHAN GORÊN KOMÎ HENE KU NEHATINE VEKIRIN
Ev gora komî ya li Goristana Hasfayê yek ji dehan gorên komî yên ji hestiYên Êzidiyan e ku li xaka Iraqê ne û hîn jî nehatine vekirin. Rêxistinên mafên mirovan ên navneteweyî destnîşan dikin ku ji bo gorên komî bêne vekirin, cenaze bêne teşhîskirin û kiryar bêne darizandin divê mekanîzmayên edaletê yên navneteweyî bikevin dewrê.
