Serokê Giştî yê CHPê yê berê Kemal Kiliçdaroglu serdana nexweşxaneya ku endamê Şandeya DEM Partî ya Îmraliyê û Serokwekîlê Meclîsê Sirri Sureyya Onder tedawî dibe kir. Kemal Kilicdaroglû li nexweşxaneyê bi Hevserokên Giştî yên DEM Partî Tulay Hatimogullari, Tuncer Bakirhan û bijîşkê Sirri Sureyya Onder ameliyat kirine re hevdîtin kir û derbarê rewşa Sirri Sureya Onder de agahî girt. Di hevdîtinê de Kemal Kiliçdaroglu bi lêv kir ku beriya çend rojan bi Sirri Sureyya Onder ve li ser telefonê axiviyê û got: “Em ji bo Sirri Sureyya Onder dua dikin. Henekên wî pir xweş bûn. Merovekî pir baş e. Em hevî dikin agahiyên baş bigrin.”
‘DIVÊ HEMÛ PARTÎ RÊXISTIN TEVLÎ PÊVAJOYÊ BIBIN’
Di hevdîtinê de piştî pirsîna rewşa Sirri Sureyya Onder li ser pêvajoyê jî axaftin hatin kirin. Tuncer Bakirhan bal kişand ser pêvajoyê û wiha got: “Pêvajoyek pir girîng heye. Banga Birêz Abdullah Ocalan ji bo hemû gelên bindest, jin, karker û hemû gelan e. Divê hemû partiyên siyasî piştgirî bidin pêvajoyê û ew jî tevlî pêvajoyê bibin. Keseyatên weke wî ji bo vê pêvajoyê pir girîng e. Ew pêvajo ne tenê di navbera DEM Partî û AKPê de ye. Heke wisa be encam nagire. Divê hemû partî rêxistin jî tevlî pêvajoye bibin.”
‘PÊVAJO JI BO TIRKIYEYÊ PIR GIRÎNG E’
Kemal Kilicdaroglû jî li ser girîngiya pêvajoyê rawestiya û got ku DEM Partî baş dixebitê û rolekî girîng dilîze. Kemal Kilicdaroglû anî ziman ku pêvajo ji bo Tirkiyeyê pir girîng e û pêdiviya Tirkiyeyê jî çareseriyê heye.
ROLGIRTIN PÊWÎST E
Aktivîsta Tevgera Jinên Azad (TJA) Sabahat Tuncel jî bi lêv kir ku divê di pêvajoyê de hemû kes rol bigire û got: “Hûn dibêjin ez rewşa Tirkiyeyê û Rojhilata Navîn temaşe dikim. Lê ji bo vê pêvajoyê temaşekirin nabe. Rolgirtin pêwîst e. Divê qanûna înfaza biguhere û girtiyên siyasî û girtiyên nexweş bên berdan. Em hatin berdan lê hevalên me hê jî di girtîgehan de ne. Ji bo wê jî, xwedî derketina vê pêvajoyê pir girîng e.”
Piştî hevdîtinê Kemal Kilicdaroglû li ber nexweşxaneyê daxuyaniyeke kin da û got: “Li gorî agahiyên ku me ji bijîşkan wergirtine, dema nivandina Siri Sueyya Onder 5 rojan dirêj kirine. Em bi hevîne ku Sirri Sureyya Onder baş bibe.”
