Çeteyên girêdayî HTŞ’ê bi piştgiriya Tirkiye û DYE’yê êrîşên xwe yên li ser Rojava dijwar kirin. Bi taybetî jî çete hewl didin çeteyên DAÎŞ’ê yên li girtîgehan serbest berdin.
Her ku êrîşên li ser Rojava zêde dibin; Kurdên li Tirkiye, Bakur, Başûr, Rojhilat û Ewropayê ji bo piştgiriya Rojava derdikevin kolanan. Hevserokê Komeleya Hiqûqnasên ji bo Azadiyê (OHD) Şaxa Stenbolê Îshak Demîrel êrîşên li ser Rojava ji ANF’ê re nirxand.
‘EV ÊRÎŞ JI BO TASFIYEKIRINA HERÊMÊN KURDAN TÊN KIRIN’
Demîrel diyar kir ku Peymana 10’ê Adarê ya di navbera QSD û hikûmeta demkî ya Sûriyeyê de girîng bû, lê di vê qonaxê de HTŞ pê ve girêdayî nema. Demîrel destnîşan kir ku HTŞ bi taybetî piştî civîna di navbera Barrack û Trump de pêşî êrîşî Helebê kir û piştre jî êrîşî bajarên Kurdan ên wekî Kobanê û Hesekê kir û wiha domand:
“Peymana 10’ê Adarê çi dixwest? Bi rastî, dewletek cuda ji Sûriyeyê nedixwest. Di çarçoveya feraseta neteweya demokratîk de, tiştên ji Tirkiyeyê dihatin xwestin ji bo wir jî dihat xwestin. QSD naxwaze ji Sûriyeyê veqete an jî dewletek serbixwe ava bike. Di bin banê rêveberiya xwe de avnaiyeke xweser ku karibe biryarên xwe bi xwe bide dixwest. Jixwe çarçoveya Peymana 10’ê Adarê ev bû. Ew pêvajoyek bû ku her du aliyan wê demê erê kiribûn û me hêvî dikir ku komîsyon werin avakirin da ku wê bi cih bînin.
Çeteyên cîhadîst di serê meha çileyê de li du taxên Helebê komkujiyek li dijî Kurdan dan destpêkirin. Wê demê eşkere bû ku ev komployek navneteweyî bû. Komîsyona ku her tim piştgiriya xwe ji bo QSD’ê ragihandiye, ji wê demê ve tu daxuyanî an jî piştgirî pêşkêş nekiriye. Berevajî vê, em dibînin ku ew piştgiriyê dide HTŞ’ê. Hevdîtina Tom Barrack û Trump bi Şara re vê yekê nîşan dide.
Piştî Şêxmeqsûd û Eşrefiyê, wekî ku Mazlûm Ebdî jî diyar kir QSD ji bo pêşîgirtina li şerê navxweyî vekişiya. Lê HTŞ bi vê yekê razî nebû û di vê qonaxê de êrîşek ferz kir û hewl da ku bi tevahî deverên ku Kurd ji bo hebûna xwe têkoşin ji holê rake.”
Îshak Demîrel bal kişand ser bandorên pêvajoya li Rojava ya li ser Tirkiyeyê û diyar kir ku divê Tirkiye demildest dawî li piştgiriya HTŞ’ê û Şara bîne. Demîrel anî ziman ku dema ku şer li wir berdewam dike aştî li Tirkiyeyê ne pêkan e û wiha pêde çû: “Xebata komîsyonê li ber bidawîbûnê bû. Niha li bendê bûn ku qanûnan derxin. Lê di vê nuqteyê de bê ev qanûn wê çiqas azadîxwaz be tê nîqaşkirin. Her çiqasî li Rojava hewldaneke ku Kurdan bi tevahî bêtefînin heye jî, ne raste ku zêdetir mafên Kurdan bidin û Kurdan wekî hêmanên damezrîner bibînin. Eşkere ye ku Tirkiye nikare vê yekê pêk bîne.
Di bin van şert û mercan de, pêvajoyek bi tendurist pir ne mimkûn bimeşe. Ji bo ku pêvajo bi awayekî tendurist bimeşe, hewceye ku Tirkiye demildest li Rojava hemberî Şara û HTŞ’ê derkeve. Divê ev hewldana komkujiyê ya li dijî Kurdan rawestîne. Ji ber ku ji Helebê ve û bi taybetî piştî şeva borî, şerê li Kobanê nîşan da ku Kurdên li Tirkiye û Bakurê Kurdistanê bi hev re dengê xwe bilind kirin; ev yek di çalakiyên li Ewropa û Hewlêrê bi zelalî hat dîtin. Xuyaye ku Kurd êdî vê yekê qebûl nakin û li herêmên din jî bêdeng namînin. Ger şer li wir berdewam bike, pir ne pêkan e ku li vir aştî pêk were.”
