Komeleya Rojnamevanan a Dîcle Firatê (DFG) rapora meha Mijdarê ya binpêkirina mafên rojnamevanan û neheqiya li saziyên çapemeniyê tê kirin, bi raya giştî re parve kir. Li gorî rapora DFG’ê; 8 rojnamevan hatine binçavkirin, der barê 14 rojnamevanan de lêpirsîn hatiye destpêkirin, 5 rojnamevan di şopandina nûçeyan de hatine astengkirin, der barê 8 rojnamevanan de doz hatine vekirin û darizandina 79 rojnamevanan jî berdewam kiriye.
Rapora meha Mijdarê ya DFG’ê bi vî rengî ye:
“Meha Mijdarê meheke ku bi nîqaşên li ser demokratîkbûnê û pêşketinên dîrokî pêk hatin ve bi dawî bû. Binpêkirinên li dijî rojnamevanan berdewam kirin. Rojnamevan bi awayekî bêhiqûqî hatin desteserkirin. Lêpirsînên nû hatin destpêkirin. Tevî nebûna delîlan jî ew bi cezayên giran re rû bi rû man.
Di meha Mijdarê de 8 rojnamevan hatin binçavkirin. Serdozgeriya Komarê ya Stenbolê di çarçoveya lêpirsîna derbarê Serokê Şaredariya Bajarê Mezin ê Stenbolê yê ku girtî tê darizandin Ekrem Îmamoglu de lêpirsîn da destpêkirin û rojnamevan Soner Yalçin, Şaban Sevînç, Asli Aydintaşbaş, Ruşen Çakir, Batûhan Çolak û Koordînatorê Ragihandinê yê CHPê Ogan Yavûz ketin ber lêpirsînê. Van rojnamevanan bi angaşta “Bi eşkereyî agahiyên derew belav kirine û alîkariya rêxistinên sûc kirine” hatin sûcdarkirin.
Di meha Mijdarê de jî li qadê astengkirina rojnamevanan dewam kir. Polîsan bi awayekî sîstematîk rê li ber rojnamevanên ku hewl didan dîmenên protestoya xwendekarên Zanîngeha Wanê ya Yuzuncu Yilê bigirin, girt. Di meha Mijdarê de rê li ber pênc rojnamevanan hat girtin ji bo ku nûçegîhaniyê nekin. Ev yek bû sedema muameleya xirab li rojnamevanekî, gef li çar rojnamevanan hat xwarin. Rojnamevanek di girtîgehê de bi binpêkirinên mafê xwe re rû bi rû ma.
Di meha Mijdarê de dema ku rojnamevan hatin darizandin û cezayên giran li wan hatin birîn. Lêpirsînên nû li dijî 14 rojnamevanan hatin destpêkirin û lêpirsînên li dijî 8 rojnamevanan veguherî dozê ango darizandinê. Dozên 79 rojnamevanan di 46 dozan de berdewam kirin û 15 rojnamevan jî di nav wan de rojnamevan Hamdûllah Bayram û Rahîme Karvar hebûn û bi giştî 17 sal û 5 meh cezayê hepsê li wan hat birîn.
Li gel lêpirsîn, darizandin û cezayan, me parastina rojnamevaniyê berdewam kir. Dozên heft rojnamevanên ku ji ber bîranîna Nazim Daştan û Cîhan Bîlgîn ku di êrişa SÎHA’yê ya Tirkiyeyê de dema ku li Bakur û Rojhilatê Sûriyeyê nûçeyan dişopandin hatin qetilkirin. Doza 8 rojnamevanên din jî ji ber ku şopandina xwepêşandanên Saraçhaneyê hatin darizandin, bi beraetan bi dawî bûn.
Rojnamevan Alî Bariş Kurt ku di 8ê Sibata 2025an de hatibû girtin û piştî ku Dadgeha Bilind cezayê wî yê 2 sal û 4 meh ê hepsê yê ji ber “Bi rêya çalakiyên xwe yên pîşeyî û nivîsên xwe yên medyaya dîjîtal propagandaya rêxistinê kiriye” pejirand, hatibû girtin. Ew li Girtîgeha Tîpa Lyê ya hejmara 1an a Maltepeyê ye û berdana wî bi awayekî kêfî hatibû taloqkirin. Lîjneya Rêveberiya Girtîgehê û Şopandinê bi hinceta ku Kurt “poşman nabe û îhtîmal e ku zirarê bide yên din” berdana wî şeş mehan taloq kir.
Di meha Mijdarê de dozek nû li dijî Midûra Nûçeyan a JINNEWS’ê Oznur Deger hate vekirin. Doz li dijî rojnamevan Oznur Deger û Osman Akin ku edîtorê berê yê Rojnameya Yenî Yaşamê bû hate vekirin. Ji ber raporeke ku wê di 16ê Tîrmeha 2024an de, derbarê îşkenceya ku dema serdegirtina malê li taxa Eskîhîsar a navçeya Nisêbînê ya Mêrdînê de weşandibû hate vekirin. Dozek li dijî Oznur Deger di meha Cotmehê de bi mehkûmkirina “sûc” encam da û em vekirina sê dozên “sûc” ên nû red dikin. Hedefgirtina hevkarên me bi van dozan kêfî ye. Em ê li dijî vê rewşa kêfî têkoşîna xwe bidomînin.
Ziyana ku ji ber tayînkirina mufetîşan li dezgehên medyayê çêdibe berdewam dike. Mufetîşê ku ji bo Tele 1ê hatiye tayînkirin 30 kes ji kar derxist. Di heman demê de Rojnameya Hurriyetê 59 kes ji ber “sedemên aborî” bêkar hişt.
9 malper hatin girtin û ragihandina nûçeyekê hate astengkirin. Ragihandina 2 hezar û 61 parvekirinên Xê jî di meha Mijdarê de hatin astengkirin û RTUK cezayên îdarî li pênc weşanan birî.
Her çiqas di meha Mijdarê de di çarçoveya pêvajoya ‘Aştî û Civaka Demokratîk’ li Tirkiyeyê pêşketinên girîng qewimîn de jî gotinên provokatîf û hedefgirtina kes û saziyan ji aliyê hin rojnamevanan ve binpêkirinên mafên mirovan pêk tînin. Em van binpêkirinan dibînin û li ber çavan digirin. Wekî ku me ji destpêkê jî gotiye, em piştgiriyê didin pêvajoya ‘Aştî û Civaka Demokratîk’ ji hemû hevkarên xwe dixwazin ku li kêleka rojnamevaniya aştiyê bisekinin da ku ev pêvajo bi Tirkiyeyek demokratîk bê tacîdarkirin.”
