Piştî Colemêrg, Esenyûrt, Êlih, Mêrdîn, Xelfetî, Dersim û Xozatê, li navçeya Miks a Wanê jî desteserkirina şaredariyê li gelek bajaran hate protestokirin.
ŞIRNEX
Rêxistina Partiya Wekhevî û Demokrasiyê ya Gelan (DEM Partî) xespkirina Şaredariya Miksê protesto kir. Çalakî li Kolana Sanat a li Cizîrê hate lidarxistin. Di çalakiyê de pankarta “Qeyûm derbeya li îradeya gel e” hate vekirin û dirûşmeyên “Bêdengî mirin e, berxwedan jiyan e” hatin berzkirin.
Hevseroka Şirnexê ya DEM Partiyê Nûrcal Alturk bang li hikûmeta AKP’ê kir ku dawî li van polîtîkayên qirêj bîne.
Parlamenterê Şirnexê yê DEM Partiyê Zekî Îrmez jî got, “Li Aliyekê çareseriyê diaxivin, dibêjin bila DEM Partî û Birêz Abdullah Ocalan hevdîtinê bikin, li aliyê din jî van polîtîkayên qirêj dimeşînin.” Gel bi berzkirina dirûşmeyan heta avahiya Cizîrê ve meşiya.
ANTALYA
Rêxistina Partiya Wekhevî û Demokrasiyê ya Gelan (DEM Partî) a Antalyayê li avahiya partiyê derbeya qeyûman protesto kir. Ji Rêveberên partiyê Evîn Akdag axivî û got: ‘’Dorpêçkirina şaredariyan bi awayekî eşkere nîşan dide ku rejîma siyasî meşrûbûna xwe ya demokratîk ji dest daye. Li ser vê xakê tu desthilatdarî bi zordestî û zulmê ava nebûne û ava nabin jî. Ev derbeyeke li îradeya gel e. Ev deq û dolaba li hemberî hêviyên aştiyê ne. Em ê tu carî serî netewînin û em ê tim têkoşîna xwe bidomînin.’’
WAN
Li Wanê jî gelek kes hatin li ba hev û heya Qada Bajêr meşek hate lidarxistin. Di meşê de dirûşmeyên; ‘’Wê qeyûm biçin û gel were’’, Bijî berxwedana Miksê” û “Bijî berxwedana Rojava” hatin berzkirin.
Hevseroka Bajêr a DEM Partiyê Gulşen Kûrt axivî û got: ‘’Gelê Wanê di hilbijartinan de îradeya xwe bi awayekî zelal nîşan da. Desthilatdariya AKP-MHP’ê li hemberî gelê Wanê derbeyeke siyasî pêk tîne. Gelê me wê tu carî vê yekê qebûl neke.’’
Hevşaredara Bajarê Mezin a Wanê Neslîhan Şedal jî got: ‘’Li ser van xakan qirkirinên pir mezin hatin kirin. Pêşengên gelê Kurd hatin darvekirin û sirgûnkirin. Lê belê gelê Kurd li hemberî van polîtîkayan serê xwe netewand. Gelê Kurd bi têkoşîneke mezin berxwedana xwe mezin kir.’’
Parlamenterê Colemêrgê Vezîr Coşkûn jî axivî û ev yek anîn ziman: ‘’Yên ku îro weke qeyûm dikevin avahiyên şaredariyan bila bizanibin ku wê rojekê di dadgehên serbixwe de hesaba vê yekê bidin. Em wan ji Koçgirî, Roboskî û Zîlanê nas dikin. Wan di wê serdemê de jî tu encam bidest nexistin û îro jî tu encaman bi dest naxin. Ji ber ku li Îmraliyê tecrîdeke giran heye îro qeyûm tên tayînkirin. Ew nizanin ku ew ê li Kurdistanê bi van polîtîkayan tu encaman bi dest naxin.’’
Coşkûn herî dawiyê got: ‘’Divê gelê me li hemberî van êrîşan berteka xwe ya demokratîk nîşan bide. Ger em li hemberî vê yekê dernekevin wê di pêşerojê de kargehên gel jî desteser bikin. Çimkî ev zîhniyet, zîhniyeteke wisa ye.’’
