DEM Partiyê di daxuyaniya nivîskî de got, “24’ê Nîsana 1915’an zêdeyî du sed rewşenbîrên Ermenî, ji malên xwe hatin girtin û ber bi mirinê ve hatin şandin. Li ser vê qirkirina nasnameya etnîk, bawerî û çandî 111 sal derbas bûn. Ev pêvajoya ku 24’ê Nîsanê destpê kirî, bi qetilkirin û sirgûna bi sed hezaran Ermeniyan dewam kir. Gelên din ên Xristiyan ên vê xakê di encama van polîtîka û pêkanînan de berdêlên pir giran dan, hatin qetilkirin.”
Di daxuyaniyê de ev tişt jî hate gotin, “Divê weke civakî û siyasî were qebûlkirin ku li vê xakê ti nasnameyên etnîk, ziman, çand yan jî bawerî ji yên din jortir nînin, hemû jî wekhev in.”
DEM Partiyê diyar kir ku bi Ermenistanê re pêşxistina têkiliyên dîplomatîk, bazarî, aborî û çandî hem ji bo pêdivî û berjewendiyên gelan e, hem jî li herêma Kafkasyayê avakirina aştiyê ye û got, “Weke gelên qedîm ên Enatoliya û Mezopotamyayê em şîn û êşên 111 salan ên gelê Ermenî û gelên din ên Xristiyan careke din parve dikin; hemû mirovên xwe yên di wê demê de hatine qetilkirin careke din bi xemgînî û rêzdarî bi bîr tînin. Em vê trajediya mezin a mirovahiyê, di kûrahiya dilê xwe de hîs dikin.”
