Rêxistina Navneteweyî ya Koçberiyê (IOM), ragihand ku di meha Hezîranê de zêdetirî 230 hezar Efgan neçar man ku ji Îranê derkevin.
Bi mîlyonan Efgan li Îranê dijîn, ku piraniya wan “neqanûnî” ne. Îranê, heta roja Yekşemê dem dabû wan ku ji welêt derkevin.
Berdevkê IOM’ê Avan Azeez, ê ji AFP’ê re axivî, got ku di navbera 1 û 28’ê Hezîranê de 233,941 Efganî sînor derbas kirine û tenê di hefteya 21-28’ê Hezîranê de 131,912 kes vegeriyane.
Azeez, da xuyakirin ku di navbera 1’ê Çile û 28’ê Hezîrana 2025’an de bi tevahî 691,049 kes vegeriyane, ku ji sedî 70’ê wan bi zorê hatine dersînorkirin.
Penaberên Efganî yên li Pakîstan û Îranê bi girseyî têne dersînorkirin. Tehran û Îslamabadê ji meha Nîsanê ve bi betalkirina destûrên rûniştinê yên penaberan pêvajoya dersînorkirinê bilez kirine.
Efganistan, ku ji hêla Talîbanê ve tê rêvebirin, bi fermî wekî “di aştiyê de” dijî tê hesibandin; lê li gorî NY, ji sê yek nifûsa wê birçî ye, ji sedî 85 bi kêmtirî 1 dolarî di rojê de dijîn.
Malbatên vedigerin û digihîjin Efganistanê, ew li kampên demkî dimînin; gelek ji wan nizanin biçin ku derê û di şert û mercên jiyaneke nebaş de dijîn.
