Fermandariya Giştî ya Hêzên Ewlekariya Hundirîn a Herêma Bakur û Rojhilatê Sûriyeyê der barê êrîşa çekdaran li dijî navendeke li bajarokê Dîban ê gundewarê Dêrazorê de daxuyaniyek da.
Di daxuyaniyê de ev tişt hat gotin:
“Îro saet 11ˊê sibehê, du terorîstên çekdar ên ku li motorsîkletê siwar bûbûn, li bajarokê Dîbanê yê gundewarê Dêrazorê navendeke hêzên me armanc kirin. Gule rasterast li hêzên me barandin û yek ji endamên me birîndar kirin.
Endamê birîndar tavilê rakirin nexweşxaneyê, di heman demê de hêzên me li herêmê dest bi lêgerîn û şopandina sûcdaran kir. Da ku wan bigirin û radestî dadgehê bikin.
Em, Hêzên Ewlehiya Hundirîn ên Bakur û Rojhilatê Sûriyê, pabendbûna xwe ya berdewam ji bo parastina ewlehî û aramiya herêmên me piştrast dikin. Ev hewldanên tirsonek dê me ji şopandina her kesê ku cesaret dike destwerdanê li ewlehî û aramiya gel bike dûr nexin. “
Êrîşa duyemîn jî di saet 13:30ˊan de li dijî nuqteyeke kontrolê ya li xaçerêya El Etal a di navbera bajarokên El Bisêra û El Şihêl de hedef girt.
Di daxuyaniyê de ev agahî hatin parvekirin:
“Îro saet 13:30ˊan de, komeke terorîstan li ser motorsîklêtê mermî li nuqteyeke kontrolê ya hêzên me li xaçerêya El Etal a di navbera bajarokên El Bisêra û El Şihêl de reşandin. Hêzên me bersiva jêdera guleyan de da.
ji bo hewldana bêîstîqrarkirina herêmê ev êrîşa duyemîn e li ser hêzên me di heman rojê de.
Em wek Fermandariya Giştî ya Hêzên Ewlekariya Hundirîn a Bakur û Rojhilatê Sûriyê, bersiva xwe ya berdewam a li hember van êrişan, şopandina sûcdaran û anîna wan ber bi dadgehê ve piştrast dikin.“
