Navenda Ragihandinê ya Hêzên Sûriya Demokratîk (QSD) bi rêya daxuyaniyekê şehadeta şervanekî xwe ku di encama qezayeke tirafîkê de li bajarê Qamişlo yê kantona Cizîrê şehîd bûye, ragihand.
Di daxuyaniya QSD’ê de wiha hate gotin:
‘’Hevalê me Hecî Dibe (Hewas Helîm Îbrahîm) dema erka xwe ya leşkerî dikir, di qezeyeke trafîkê de şehîd bû.
Şehîd Hecî ji malbateke welatparêz e, beriya niha dê û birayê wî di êrîşên rêjîma berê de şehîd bûn, niha jî birayên wî yên mayî jî di nava hêzên me de ne.
Şehîd Hecî tevî temenê xwe yê biçûk jî zû tevlî hêzên leşkerî bûn û beşdarî gelek pêngavên rizgarkirina herêmê ji çeteyên DAÎŞ’ê bû mîna pêngava rizgarkirina Til Temirê sala 2014, Til Birakê 2015`an, Hol û Şedadê 2015`an, Minbic 2016`an, herî dawî di berxwedana li Bedava Tişrînê de sala 2024`an û Dêr Hafirê sala 2025`an cihê xwe girt. Her wiha li dijî êrîşên dewleta Tirk a dagirker û çeteyên wê yên li ser herêmên Bakur û Rojhilatê Sûriyeyê li ber xwe da.
Di wan pêngavan de, berxwedaneke bêhempa nîşan da. Mînakê şervanê bi displîn û dilsoz bû. Di kar xwe de gelek destkeftî bi dest xistin. Bi rihê xwe yê hevaltiyê navdar bû. Her tim geşbîn bû ku dê serkeftin para me be. Lewma ji hevalên xwe re mînak û pêşeng bû.
Em sersaxiyê ji malbatê şehîd Hecî û hemû malbatên şehîdan dixwazin û teqez dikin ku em ê têkoşîna wan heta bi destxistina armanc û hêviyên wan berdewam bikin.
Nasnameya şehîd wiha ye:
Navnav: Hecî Debi
Nav û paşnav: Hewaz Ebdulhelîm Ibrahîm
Navê dê: Semahir Ehmed
Navê bav: Ebdulhelîm
Cihê jidayikbûnê: Qamişlo
Cih û dîroka şehadetê: Qamişlo –06`ê Tebaxa 2025’an
