Pîrozbahiya Newrozê ya li Amedê bi coşeke mezin didome. Ji Tevgera Jinên Azad Ayla Akat Ata xîtabî gel kir.
Ayla Akat Atayê, di serî de Mazlum Dogan, Kemal Kurkut û Zekiya Alkan bi bîr anî û got: “Şehîdên Newrozê nemirin. Îro bi me re ne, li vê qadê ne.”
Ayla Akat Atayê wiha got:
“Bi bi tenê nînin. Ji Amedê heta Mahabadê û Qamişloyê, Newroza tevahiya gelê Kurd pîroz be.
Weke TJA’yê ji vê xakê, ji Kurdistanê, ji Rojava, ji Rojhilata Navîn, bi tevahiya xwişkên xwe yên li cîhanê re, yên dibêjin ‘bedena min e, biryara min e’, bi hemû jinên dibêjin ‘dê tu caran bi tenê nemînî’ re, bi jinên li Hindistanê dibêjin ‘me tirsa xwe bi azadiyê şikand’ re dibêjin ‘jin, jiyan, azadî’ û hatin gel hev.
Hewcehî bi gotinên zêde nîne. Ev meydan, gelê Kurd bi Rêberê Gelê Kurd re ye. Em silava herî mezin ji mîmarê pêşerojeke wekhev û azad birêz Abdullah Ocalan re dişînin.”
Li ser gotinên Ayla Akat Atayê, girseyê bi yedengî dirûşma “Bijî Serok Apo” berz kir.
Ayla Akat Atayê axaftina xwe wiha qedand: “Azadiya wî azadiya gelê Kurd e, azadiya gelên Rojhilata Navîn e. Silav ji Îmraliyê re. Ev Newroz ne tenê Newroza azadiyê ye, her wiha Newroza yekitiya demokratîk e. Ji hemû gelên em bi hev re dijîn dixwazim bipirsim; gelo hûn ji bo yekitiya demokratîk amade ne? Gelo hûn ji bo azadiya Serok Apo amade ne? Gelo hûn ji bo azadiya gelan amade ne?”
Girseyê jî bi yekdengî got “Erê.”
