Li navçeya Nisêbîn a Mêrdînê bi dirûşmên “Rêbertiya Azad Civaka Demokratîk” û “Newroza Azadiyê ji bo Civaka Demokratîk” Newroz hate pîrozkirin.
Mîna li bajarên din li Nisêbînê jî gel bi kincên neteweyî tevlî pîrozbahiyê bû.
Dayikên Aştiyê, xizmên girtiyan, siyasetmedarên Kurd û dayika Rahşan Demîrel a ku sala 1992’an li Kadîfekale ya Îzmîrê bedena xwe da ber agir Emîne Demîrel tevlî pîrozbahiyê bûn.
Di pîrozbahiyê de ku bi hezaran kes amade bûn dirûşma ‘Bijî Serok Apo’ hate qîrîn.
Dayika Aştiyê Perîhan Altûg banga Rêber Apo bi bîr xist, banga xwedîderketinê kir û gel bi yek zimanî got ‘erê’. Perîhan Altûg got, “Azadî wê bi ser bikeve.”
Dayika Rahşan Demîrel Emîne Demîrel got, “Çarenûsa me bi hev ve girêdayî ye. Werin em destê Serok Apo bigirin, mîna stûnekî ji pola rakin. Em yekîtiya xwe pêk bînin.”
Endama TJA’yê Hulya Alokmen jî bang li gel kir ku piştgiriyê bide banga Rêber Apo.
Alîkara Hevserokên Giştî yên DEM Partiyê Ebrû Gunay jî got, “Birêz Ocalan careke din bi rola xwe rabû. E jî ji bo aştî û azadiyê li dora wî bicivin û govenda azadiyê bigerînin.”
Alîkarê Hevserokên Giştî yên DEM Partiyê Mehmet Ruştu Tîryakî got, “Birêz Ocalan ji bo vê gaveke dîrokî avêt. Yên ku dewlet divê bikin hene. Divê samîmî be. Ji ber vê yekê jî divê AKP tavilê hin gavan biavêje. Kurd amade ne, divê serwer jî, AKP û MHP jî gavê biavêje, tecrîd bê rakirin, operasyonên siyasî û girtin bêne bidawîkirin.”
Piştî axaftinan agirê Newrozê hate dadan, dirûşm hatin qîrîn û govend hate gerandin. Piştî ku agir hate dadan hunermend Kasim Taşdogan derkete ser dikê û hunera xwe pêşkêş kir.
