Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogullari, di Newroza li Wanê de axivî û binçavkirina Serokê Şaredariya Bajarê Mezin ê Stenbolê Ekrem Îmamoglu şermezar kir.
Tulay Hatîmogullari, destnîşan kir ku banga Rêber Apo di rojevê de ye û got, “Di pêvajoyeke ku em di çarçoveya bangê de hevdîtin dikin de, ew îro li Stenbolê operasyonan pêk tînin. Operasyona ewil li dijî şaredariyên ku di encama lihevkirina bajêr de hatine bidest xistin, pêk hatin. Her wiha li dijî HDK’ê operasyon hat kirin. Ji bo Kurdên li Stenbolê gotin ew nikarin bikevin rêveberiyê. Her Kurdek li Stenbolê dijî wê cihê xwe di rêveberiya şaredariyan de bigire. Tevî we jî em ê cih bigirin.”
Tulay Hatîmogullari, anî ziman ku ew xwedî li banga Rêber Apo derdikevin û wiha domand, “Ev bang ji bo aştiya gelê Kurd û Tirkan e. Silav ji Kawayan, Mazlûman, Denîz Gezmîşan û Mahîr Çayana re. Ev bang banga bidest xistina mafê Gelê Kurd e. Ev bang ji bo mafê hemwelatîbûnê û jiyana hevpar e. Ev bang banga, kedkaran e. Ev bang wê rê li ber qetilkirina jinan bigire. Ev bang banga vekirina qada azadiyê ji bo me jinan e. Banga ‘Jin Jiyan Azadî’ ye. Divê herî bêhtir jin û ciwan xwedî li vê bangê derkevin. Rêxistinkirina civaka demokratîk erka me jinan û ciwanan e. Ev bang ji bo rizgariya 85 mîlyon welatiyan e.”
Gelê me yê Wanê her 14 şaredarî bi dest xistin, em spasiya xwe pêşkêşî gelê Wanê dikin. Lê vîna we hate desteserkirin. Hevşaredarên Wanê, rûmeta gelê Wanê û yên me hemûyan in. Birêz Ocalan di banga xwe de behsa gelên li Rojhilata Navîn kir. Niha li Sûriyeyê Elewî û Dûrzî tên qetilkirin. Rizgariya Sûriyeyê tenê bi komara demokratîk re pêkan e. Ji vir em bang li desthilatdariyê û aqilê dewletê dikin; Banga Birêz Ocalan ji aliyê tevahiya cîhanê ve tê destekkirin. Divê dewlet erka xwe bi cih bîne û gavan bavêje. Em dixwazin ‘xwîn raweste û aştî’ pêk were.”
