Partiya Demokrasî û Wekheviyê ya Gelan (DEM Partî) di salvegera 10’emîn a pêla girtinê ya 4’ê Mijdara 2016’an a li dijî siyasetmedarên HDP’î li ber Wezareta Edaletê çalakiya rûniştinê lidar xistin û daxuyanî dan çapemeniyê.
Di daxuyaniyê de pankarta bi nivîsa “Azadî ji bo girtiyên siyasî” hate hildan. Serokwekîlên Koma DEM Partiyê Gulistan Kiliç Koçyîgît û Sezaî Temellî û parlamenterên partiyê tevlî daxuyaniyê bûn.
Sezaî Temellî bi lêv kir ku mudaxaleya dadgeriyê ya li dijî siyasetê dewam dike û got: “Darbeya 4’ê Mijdarê mudaxelaya herî mezin a li dijî siyasetê bû. Hevserokên me Fîgen Yuksekdag û Selahattîn Demîrtaş jî di nav de 15 hevalên me yên parlamenter hatin girtin. Divê êdî dadgerî dawî li mudaxaleya li dijî siyasetê bîne. Hevalên me bi awayekî li dijî hiqûqî ragirtî ne. Dadgeh hiqûqê nas nake. Dadgeh biryara Dadgeha Mafê Mirovan nas nake. Ev tê wê wateyê ku dewleta hiqûqî tune tê hesibandin. Em li welatekî welê naxwazin ku siyasetmedar lê girtî bin. Em li ber Wezareta Edaletê bang dikin ku dawî li vê sepanê bînin. Ew doz dozeke siyasî ye û bi hiqûqê re ti eleqeya wê tine ye.”
Di axaftina xwe de Sezaî Temellî bal kişand ser pêvajoya Aştî û Civaka Demokratîk û ev tişt anî ziman: “Tirkiye bi tecrîda 27 salan a li dijî birêz Ocalan hat vê rewşê. Lê niha em di pêvajoyeke re derbas dibin. Dayikên Aştiyê jî bi daxwaza aştiyê hatin vir û peyameke girîng dan. Em jî dixwazin êdî dawî li sepanên darbeyê bên û astengiyên pêşiya aştiyê bên rakirin. Dayikên Aştiyê di serdana Wezareta Edaletê de daxwaza serdana Îmraliyê kir. Me jî kir. Birêz Ocalan muzakerevanê serekê yê vê pêvajoyê ye. Em li vir bang dikin ku Wezaretê Edaletê van dosyayan bixe meriyetê. Em jî li vir bang dikin, rêya aştiyê ji Îmraliyê derbas dibe. Deriyên Îmraliyê vekin.”
Gulistan Kiliç Koçyîgît jî anî ziman ku bi banga Aştî û Civaka Demokratîk a Rêber Apo pêvajoyekê destpê kiriye û ev nirxandin kir: “Em li her derê qala girîngiya pêvajoyê dikin. Lê gel ji me dipirse. Dibêjin heta siyasetmedar girtî bin aştî çawa wê bibe. Sepanên qeyûm hebin dê çawa bibe. Heta destê dadgehê ser siyasetê ranebe wê çawa bibe. Em jî vê pirsê li vir ji desthilat û Wezareta wê dipirsin. Hê jî girtiyên nexweş nayên berdan. Em vê çawa binirxînin. Yên nelirêtiya fonan kiriye û pereyê miletê dizîne rastî tiştek nayên lê siyasetmedar ji ber fikir û ramanên xwe tên girtin. Ji bo pêvajo civakî bibe û bawerî çêbibe dikarin destê xwe bixin bin kevir. Daxwaza aştiyê mezin e. Lê bawerî tune ye. Gel dipirse; Em ê çawa ji van sepanên AKP’ê bawer bin. Wê pergaleke faşîst ava kir û hemû kes girtin û li dijî aborî, siyaset û hemû qadan darbe kir. Em ê li dijî hemû bêhiqûqiyan bisekinin. Em ê parastina aştî û demokrasiyê bidomînin. Dayikên Aştiyê hatin vir û gotin gav biavejin. Hevdîtin jî kirin. Êdî ne gotin pêdivî bi gavên şênber heye. Girtiyên siyasî berdin, sepanên qeyûm bi dawî bikin û hiqûqê serwer bikin.”
