Li gorî çavkaniyekî Ukraynayî ku ji The Guardianê re axivî, DYE’yê îstîxbarata ku dida ‘bi temamî sekinand’. Ev rewş bandoreke yekser li artêşa Ukraynayê û saziyên ewlekariyê dike.
Birîna îstîxbaratê kir ku Ukrayna nema karibe dîmenên peykê yên Emerikî bi kar bîne. Her wiha li gel peykên çavdêriyê yên ser bi Pentagonê her wiha Maxar Technologies jî têkiliya bi Ukraynayê re birî ku dîmenên peykên bazirganiyê parve dike. Pispor dibêjin xizmetên Starlinkê jî wê bi heman rengî tevbigere.
LI PÊŞBERÎ ÊRÎŞÊN RUS DIBE KU ‘KOR’ Û ‘KERR’ BIMÎNE
Şêwirmendê Ewlekariya Neteweyî yê Qesra Spî Mike Waltz diyar kir ku hem alîkariya leşkerî hem jî piştgiriya îstîxbaratî piştî pêşketina hevdîtinên aştiyê dikare ji nû ve destpê bikin. Lê belê di vê demê de dibe ku Ukrayna li hemberî êrîşên Rus ‘kor û kerr’ bimîne.
Dema ku îstîxbarata Emerikî nebe Ukrayna wê nikaribe êrîşên fuzeyan an jî bombardûmana Rusyayê berê tespît bike. Ji xwe bi vê qutkirinê re tê gotin, Rusyayê êrîşeke mezin a hewayî kir û êrîş bir ser binesaziya enerjiyê ya Ukraynayê. Li Harkivê di êrîşê de çar kes birîndar bûn.
GELO WÊ PIŞTGIRIYA ÎNGILISTAN Û FRANSAYÊ TÊRÊ BIKE?
Îngilistan û Fransayê ragihandin ku wê îstîxbarata ji bo Ukraynayê dewam bikin. Rayedarên Îngiliz anîn ziman ku wê daneyên xav ên xwe dispêrin îstîxbarata Emerikî parve nekin, lê belê sîstema hişyariya zû ya li hemberî êrîşên Rus karibin pêşkêş bikin. Wezîrê Parastinê yê Fransayê Sebatien Lecornu jî diyar kir ku Paris wê piştgiriya ‘îstîxbarata serbixwe’ dewam bike.
Li gorî pisporan qutbûna îstixbarata Emerikî ji bo Ukraynayê windahiyeke mezin e. Ukrayna di çavdêrîkirina li liv û tevgera leşkerî ya li ser sînorê Rusyayê û tespîtkirina êrîşan beriya bê kirin, zor û zehmetiyên mezin dikişîne.
