Tevgera Çanda Jinên Kevana Zêrîn têkildarî 8’ê Adarê Roja Jinên Kedkar ên Cîhanê daxuyaniyeke nivîskî da.
Di daxuyaniyê de hate diyarkirin ku 8’ê Adarê ji bo jinan roja nêzbûna azadiyê ye û ev tişt hatin gotin: “Demsala Biharê jiyan bi xwe ye; bi wateya herî kûr demsala çêbûna çand û hunerê ye. Jiyan bi civakîbûnê ava dibe; di navenda civakîbûnê jî mirovahiyê çand û hunera herî bi kok pêş xist. Çanda hevpar a civakan bedewî û huner kir yek û pêş ket.”
Di daxuyaniyê de hate destnîşankirin ku 8’ê Adarê bûye destpêka têkoşîna herî bi wate ya jinan û ev tişt hate gotin: “8’ê Adarê rojek e ku jin bi têkoşîna hevpar gav bi gav ber bi azadiyê ve dimeşin. Îsal 8’ê Adarê bi banga aştî û civaka demokratîk a Rêber Apo, hîn kûrtir bûye. Ev bang xeyala jiyaneke hevpar û azad a civakan, bi rengekî herî bedew îfade dike. Ji bo jinan pêdiviya herî mezin aştî, demokrasî û piştevaniya civakî ye. Ji ber ku bi aştiyê jiyaneke bi rûmet û azad tê avakirin. Divê herî zêde jin xwedî li vê banga Rêbertî derkevin, bipejirînin û xurt bikin. Ji ber ku jiyan, civak û aştî bi hebûna jinan pêkan e û di çanda civaka me ya qedîm de ev rastî cihê xwe diparêze.
Di van rojên dîrokî û bi wate de, weke Kevana Zêrîn em li ser bingehê çand û hunerê têkoşîna azadiyê didomînin. Em bi mîrateya berxwedana jinê 8’ê Adarê bi bîr tînin û têkoşîna jinan silav dikin. Bi hêza ku me ji banga Rêber Apo girtî, em ê li ser rêya avakirina çand û hunera civaka demokratîk, 8’ê Adarê bikin cejna azadî, aştî û hêviyê.”
