Endamên Saziyên Kantona Firatê, li dijî biryara Komîteya Wezîran a Konseya Ewropayê ya têkildarê ‘Mafê Hêviyê’ yê ji bo Rêber Apo û tecrîda ku didome nerazîbûna xwe anîn ziman.
‘LI HEMBER DAXWAZA GELÊ KURD HER KES KERR Û LAL E’
Endamê Meclîsa Malbatên Şehîdan a Kantona Firatê Ferhad Taho Hemzê, anî ziman ku Rêber Apo mafê tevahî etnîkan parastiye û wiha got, “Li hemberî tecrîd û binpêkirina maf a li ser Rêber Apo, her kes ker û lal e. Dixwazin Kurdan tine bikin. Dijmin Rêberên Kurdan Qazî Mihemed, Seyîd Riza û Şêx Seîd bidarve kirin û xwestin ku Kurdan tune bikin. Lê bîranîna wan îro di dilê me de dijîn û ew nemirin. Em Kurdin û welatê me Kurdistane, Rêberê me jî Rêber Apo ye. Qalanê vî welatî xwîne û em ê jî canê xwe bidin. Dewleta Tirk bi tecrîdê re dixwazin netewa Kurd tune bikin. Lê em û Rêber Apo di yek dil û canî de ne, ew di dil û mejiyê me de ye. Em bi fikrê Rêber Apo gihîştine vê astê.”
Endamê Partiya Yekîtiya Demokratîk (PYD) a Kantona Firatê Nisrîn Ibrahîm, jî diyar kir ku Rêber Apo bi salan e li dijî pergala tecrîdê li ber xwe dide û wiha got, “Rêber Apo bi fikr û felsefeya xwe di nava dilê tevahiya gelan e. Em bi fikir û felsefeya Rêberê xwe li virin û em ê berxwedaniya xwe berdewam bikin. Em ê di demeke nêzîk de Rêberê xwe di nava xwe de bibînin. Em bi vê yekê bawer in. Rêberê me her tim ji bo aştî pêk bê, ked daye û dixwaze civakeke aştî û civakeke demokratîk bide avakirin. Heta niha jî dewleta Tirk jî gavên şênber neavêtine. Em ê weke jinên Kobanê ji bo Rêberê xwe her li qadan bin û li ser piyan bin.”
‘ÊDÎ SEBRA ME NEMAYE’
Hevserokê Meclîsa Malbatên Şehîdan a Bajarê Sirînê Mihemed Ehmed, anî ziman ku Rêber Apo ji ber tevahî mirovahiyê têkoşîn dimeşîne û wiha domand, ” Rêber Apo ji bo azadiya tevahiya gelan li ber xwe dan. Tecrîda li ser Rêber Apo dewam dike. Dixwazin Rêbertî ji her tiştî qut bikin. Em bang li tevahî saziyên mafê mirovan dikin ku êdî demildest berê xwe bidin Îmraliyê û li wir êdî Rêberê me bi rengekî fîzîkî azad bikin. Êdî weke gel sebra me nemaye û em dixwazin îro beriya siba Rêberê me di nava me de be.”
JIN WÊ PÊŞENGIYA TÊKOŞÎNA AZADIYÊ BIKIN
Endama Kongra Star a bajarê Kobanê Şemsê Ehmed, da zanîn ku Rêber Apo ji bo azadiya tevahiya jinan têkoşîneke mezin meşandiye û wiha dewam kir, “Jin wê ji bo azadiya Rêber Apo pêşengiya têkoşînê bikin. Mafê Kurdan her hatiye binpêkirin û çewsandin. Em jî weke her civakek azadiya Rêberê xwe dixwazin. Hemû mafên Rêberê me tên çewsandin. Em dixwazin Rêberê me bi rengekî fîzîkî azad bibe. Weke her jinek, li kur dibe bila bibe em ê rabin ser piyan û ji bo azadiya wî têkoşîn bikin.”
