Endama Meclîsa Edaletê û koçbera ji Efrînê Siltana Hemdî têkildarî binpêkirin û destdirêjiyên dewleta Tirk yên li ser zevî û mal û milkên gelê Efrînê ji ANF`ê re axivî.
Siltana Hemdî di destpêka axaftina xwe de anî ziman ku gelê Efrînê cara ewil di 2018`an de koçber bû û ew heta niha li benda vegera ji bo Efrînê ne û got: ‘’Kuştin, revandin, talan û diziya mal û milkên gelên Efrînê bi rengekî bê navber tê kirin û heta niha jî berdewam dike. Piştî êrîşa dagirkeriya cara ewil a li ser herêma Efrînê xelk ber bi Şehba û Herêmên Rêveberiya Xweser ve bi rê ket. Nêzîkî 8 salan li kampên Şehba û Til Rifatê man. Lê belê dewleta Tirk carek din bi taybet li ser gelê Efrînê dest bi pêleke nû ya êrîşan kir, bi planeke nû komên çete û dewleta Tirk a dagirker êrîş birin ser Şehbayê û cara duyemîn gelê Efrînê hate koçberkirin. Koçberên gelê Efrînê jî ber bi herêmên Bakur û Rojhilatê Sûriyeyê ve meşiyan û ketin rê. Heta niha jî bendewariya vegera li ser axên xwe berdewam e’’
XWEZAYA EFRÎNÊ TALAN KIRINE, EW QIRKIRINEK E
Siltana Hemdî piştre ev yek anîn ziman: ‘’Êdî em vegereke bi ewle dixwazin, gelek malbat ber bi Efrînê ve çûne, lê belê di nava tirsekê de dijîn. Gelên ku li wir mal û milkên wan hatine desteserkirin, ew nikarin doza mafên xwe jî bikin ku ev yên wan e. Dagirkerî û çeteyên wê sûcan dikin, ne tenê li ser kesan,wan xwaza û darên Efrînê birîn û şewitandin, ew guhertinên demografîk pêk tînin. Her tişt jî li pêşiya çavên cîhanê pêk dihatin, lê belê tu kesî tu bertek nîşan nedan. Ew destdirêjiyê li ser xwezayê dikin ku ew bi xwe weke qirkirineke xwezayê ye, dewletên ku qaşo dibêjin em ji bo mafên mirovan têdikoşin, ji ber berjewendiyên xwe tu bertekan nîşan nadin. Divê ji vir û şûnda êdî her kes xwedî helwest be li hemberî dewleta Tirk ya dagirker.”
XWESTINE HETA DÎROKA EFRÎNÊ TUNE BIKIN
Siltana Hemdî di dewama axaftina xwe de anî ziman ku bi hezaran malbat di nava sar û seqemê de, di nava çadir û malên sar de dijîn û wiha got: ‘’Êdî divê doza Efrînê bê çareserkirin, dibêjin ku divê her kes vegere Efrînê. Em vegereke bi ewle dixwazin. A niha veger ne pêkan e, heta ku ew çete li wir bin, gel nikare here nava zevî û erdên xwe. Jıber ku gel rastî destdirêjî û qetilkirinê tê. Mal û milkên wan ji xwe re dibin û kes nikare deng jî bike. Ma ev yek tê wateya vegera li ser axên xwe? Êdî em vegereke bi ewle dixwazin. Niha darên zeytûnan tên dizîn, fabrîqeyên gelên Efrînê tên firotin û malên wan difiroşin hev. Ev erd yên me ne û ne yên wan in. Destdirêjiya dîroka Efrînê jî kirin û cihên dîrokî hilweşandin.’’
EFRÎNA BI EWLE EW E KU ZAROKÊN WÊ, WÊ BIPARÊZIN NE ARTÊŞEKE CUDA
Siltana Hemdî di dawiya axaftina xwe de ev yek anîn ziman: ‘’Vegereke ku em xwe bi rê ve bibin, em bi zarokên xwe vegerin ku ew parastina me bikin, bi artêşeke din ne pêkan e ku parastina Efrînê were kirin. Em dixwazin zarokên me bi me ra bin û em axa xwe û bajarê xwe biparêzin. Em ê di demek nêz de jî bi vê yekê vegereke bi ewle misoger bikin.”
