Ji destpêkirina pêlên êrîşên li ser Bakur û Rojhilatê Sûriyeyê ve ye gel neçar ma ku berê xwe bidin cihên ewle û li wir niştencih bibin. Li bajarê Kobanê nêzî 200 hezar kes li zêdeyî 70 navendên cuda hatine bicihkirin. Têkildarî vê mijarê Hevserokê Desteya Kar û Barê Civakî û Kedkaran Ehmed Xoce ji ANF`ê re axivî.
Ehmed Xoce di destpêka axaftina xwe de diyar kir ku Kobanê ji çar aliyan ve hatiye dorpêçkirin û got: “Piştî pêlên êrîşan ên li ser bajarên Bakur û Rojhilatê Sûriyeyê, pêlên mezin yên koçberiyê berê xwe dan bajarê Kobanê. Ji destpêka pêlên êrîşan yên li ser taxên Şêxmeqsûd û Eşrefiyê, gelên ji her du taxan û ji hemû deverên din yên ku çete xwe lê digirin gel neçar ma ku berê xwe bide bajarê Kobanê. Niha ew koçber di nava rewşeke krîtîk de dijîn. Ew li dibistan, zanîngeh, mizgeft, eywanên şahiyan, akademî û gelek cihên din hatine bicihkirin. Di her maleke Kobanî de çar û pênc malbat tevlî nava malê bûne.”
ZÊDEYÎ 200 HEZAR KES KOÇBER BÛNE Û BERÊ XWE DANE KOBANÊ
Ehmed Xoce piştre bal kişand ser rewşa koçberan û ev yek anîn ziman: ‘’Li bajarê Kobanê bi sed hezaran kesî cih girtiye. Ruxmî ku berf, baran û rewşa hewayê ya sar jî, gel bi rengan debara jiyana xwe dike. Em niha hewl didin ku hejmara koçberên li vir diyar bikin, lê belê a niha li gorî ku tê texmînkirin 200 hezar kesî derbas kiriye. A niha bajarê Kobanê dorpêçkirî ye, ji ber vê yekê jî ev koçber jî ji hin tiştan mehrûm dimînin. Hin pêdivî bi rengekî qaçax derbas dibin, lê belê dîsa jî bi du qat û sê qatan zêdetir tên firotin.”
MAL Û MILKÊN KOÇBERAN TÊN TALAN Û WÊRANKIRIN
Ehmed Xoce di dewama axaftina xwe de diyar kir ku mal û milkên koçberan hatine talankirin û got: “Mal û milkên van koçberan hatine talan û wêrankirin, mal û milkên wan tên dizîn û dûra malên wan dişewitînin. Hin belge di destê me de hene ku vê yekê teqez dikin. Ruxmî ku gelek caran şandeyên me berê xwe dan parêzgeha Helebê û bi taybetî jî ji bo ku koçber vegerin mal û milkên xwe, lê belê ew yek heta niha pêk nehatiye. Berovajî wê ew hîna xwe di wan mal û milkên wan gelan de xwe bi cîh dikin, xerab dikin, talan dikin û dişewitînin.”
Ehmed Xoce di dawiya axaftina xwe de ev yek anîn ziman: ‘’Eger rewş wiha dewam bike û dorpêç wiha dewam bike wê bi xwe re kareseteke mirovî bîne. Bi taybetî jî em weke Desteya Kar û Barê Civakî û Kedkaran em ê heta dawiyê xwedî li van koçberên xwe derkevin.’’
