Malbatên ku di kombûna ‘Ber bi aştiyê ve: Bîr û Edalet’ a li Amedê li hev kom bûn, ji bo xwedîderketina li pêvajoya aştiyê bang kirin.
DIVÊ EV ŞER ÊDÎ BIQEDE
Nezahat Teke diyar kir ku ew ji bo aştiyê li hev kom bûn, ji bo aştiyê têdikoşin û got, “Me dixwest îro li vê derê dayikên leşker û polîsan ên jiyana xwe ji dest dan, bibînin. Di vî şerî de wan jî zarokên xwe ji dest dan. Em zanin ku dema dayikek zarokê xwe ji dest bide êşeke çawa dikişîne. Em dixwazin bernameyên bi vî rengî li her derê bêne kirin. Em dixwazin her kes li ser aştiyê biaxive. Ev şer divê êdî biqede. Me gelekî êş kişand. Em pêvajoyeke ji aştiyê dixwazin ku nema rondikên çavan dibarin. Pêwîstiya vê xakê bi aştiyê heye. Divê her kes ji bo vê hewl bide. Em naxwazin zarokên xwe bixin binê axê, em dixwazin wan hembêz bikin. Eger li holê agirbestek hebe divê herdu alî li gorî vê tevbigere. Aştî divê bi du alî be. Girtî hemû divê bêne berdan. Dewlet divê tavilê vî şerî biqedîne.”
DEWLET DIVÊ VÊ FIRSENDÊ JI DEST BERNEDE
Velî Encu diyar kir ku ew piştgiriyê didin pêvajoya aştî û çareseriyê ku Rêber Apo da destpêkirin û got, “Em vê pêvajoyê gelekî girîng dibînin û piştgiriyê didin pêvajoyê. Weke malbatên ji Roboskî em her tim bûn alîgirê aştiyê. Êş divê ji hev neyên cudakirin. Êş û daxwaz yek e. Me piştgirî da her gavek ji bo aştiyê. Ne tenê Kurd divê her kes xwedî li vê pêvajoyê derkeve. Canê me şewitî, me xizmên xwe yên herî hêja ji dest dan. Divê êdî pêşî li vê yekê bê girtin. Bi rengekî samîmî divê xwedî li vê pêvajoyê bê derketin. Birêz Ocalan di vir de bi berpirsyariyeke dîrokî rabû û wezîfeya xwe bi cih anî. Divê dewlet vê firsendê ji dest nede û binirxîne.”
PÊWÎSTIYA ME HEMÛYAN BI AŞTIYÊ HEYE
Afîfe Kartal destnîşan kir ku divê dewleta Tirk gavên şênber têkildarî pêvajoya aştiyê tavilê biavêje û got, “Pêwîstiya me hemûyan bi aştiyê heye. Em aştiyeke bi rûmet dixwazin. Bila li vê xakê êdî aştî, xwişk û biratî hebe. Ez ji vê derê bang li Birêz Erdogan û Bahçelî dikim; Xwedî li pêvajoya aştiyê derkevin ku Birêz Ocalan da destpêkirin. Min keçeke xwe ji dest da, kurekî min li girtÎgehê ye. Li gel ewqas tiştan jî em di aştiyê de israr dikin. Em naxwazin êdî dayik êşê bikişînin.”
