Di nava Tevgera Azadiyê ya Kurd de girîngî cihê şehîdan her tim cuda ye. Pênaseya şehîdan her tim xwedî cihekî girîng e, hurmeta li şehîdan jî timî girîng e.
Di nava dîroka têkoşînê ya Tevgera Azadiyê ya Kurd de zêdeyî deh hezaran şehîd hatin dayin. Berxwedana gelê Kurd a li hemberî êrîşên qirkirinê bi saya şehîdan gihîşt vê astê. Yek ji van şehÎdan jî Karker Masîro bû. Karker Masîro di sala 2005’an de di dema pêvajoya berxwedanê ya xwerêveberiyê de tevlî nava refên gerîla bû û sala 2019’an li Mêrdînê şehîd bû.
HPG’ê di daxuyaniya xwe ya têkildarî Karker Masîro (Halîl Erdem) de ji bo Masîro got, “Hevrê Karker ku samîmiyeta dilê wî û hezkirina wî li rûyê wî xuya dikir, milîtanekî şoreşger ê rasteqîn bû. 24 saetan xwe perwerde dikir, wezîfeyên xwe bê kêmasî bi cih anî.”
Xwişka Karker Masîro Gûrbet Taş qala birayê xwe kir û got, “Zilma li ser welatê me qebûl nekir.”
Gûrbet Taş ji ANF’ê re qala birayê xwe û armancên wî kir.
‘HEVALÊ KARKER ZILMA LI SER WELATÊ ME QEBÛL NEKIR’
Gûrbet Taş anî ziman ku ew ji gundê Selhê yê navçeya Mîdyat a Mêrdînê ne û got, “Hevalê Karker yekî leheng bû. Gelekî xebatkar bû. Di dema xendekan de got, ez zilma li ser welatê me qebûl nakim. Çû, tevlî xendekên xwerêveberiyê bû. Heta roja dawî li wê derê bi wan re ma. Piştre jî tevlî bû û nexwest vegere. Piştî ku 6 salan li wir ma, li gundê Stewrê yê Omerlî şehîd bû.”
‘DEMA KU EM DIÇIN CIHEKÎ NIKARIN BI ZIMANÊ XWE BIAXIVIN’
Gûrbet Taş qala bendewariya xwe ji pêvajo nû re kir ku bi banga Rêber Apo destpê kir û anî ziman ku ew aştiyê dixwazin. Gûrbet Taş got, “Wellehî miletê me, me gelek berdêl dan. Em aştiyê dixwazin. Em dixwazin bi zimanê xwe biaxivin. Em dixwazin li vî welatî çi mafê wan hebe, yê me jî hebe. Destpêkê qala aştiyê dikin. Piştî du rojan jî weke ku aştiyê naxwazin dikevin nava hewldanan. Em hemû aştiyê dixwazin. Em gelek zehmetiyan dikişînin. Dema ku diçin cihekî nahêlin em bi zimanê xwe biaxivin. Zext li me tê kirin ku em bi Tirkî biaxivin. Em nizanin zêde bi Tirkî biaxivin. Ew jî bi zora me diçe. 20 sal in em li vê derê ne. Eger karek li welatê me hemûya em ê lê vegeriyan.”
‘EM AŞTIYÊ DIXWAZIN LÊ BELÊ DEST JI ZIMANÊ XWE BERNADIN’
Gûrbet Taş destnîşan kir ku ew xweranegirtina li Kurdî ya li komîsyonê qebûl nakin û got, “Wellehî em dest ji zimanê xwe bernadin. Me çi kiribe me ji bo zimanê xwe kiriye. Çi dibe bila bibe em dest ji zimanê xwe bernadin. Nehiştin dayikên me yên aştiyê bi zimanê xwe biaxivin, vê yekê em gelekî êşand. Çi bibêjim, çawa bibêjim, em dest ji zimanê xwe bernadin, em dixwazin girtiyên li girtîgehan bêne berdan. Em dixwazin ku Rêberê me berdin. Bila Selahattîn Demîrtaş, Fîgen Yuksekdag berdin. Bila hemûyan berdin. Belê, em aştiyê dixwazin. Em dest ji zimanê xwe bernadin.”
