Daxuyaniya Desteya Perwerde û Fêrkirinê ya Kantona Firatê ji aliyê Mamoste Ronîda Elî ve hat xwendin. Daxuyanî li pêşiya Desteya Perwerde û Fêrkirinê bi amadebûna bi dehan mamosteyan hat xwendin.
Daxuyanî bi vî rengî ye:
“Roja Zimanê Dayikê ya Cîhanî li gelê Kurd û hemû gelên cîhanê pîroz be. Bi vê boneyê em hemû kesên ku di ber ziman de ked dane û şehîd bûne bi rêzdarî bi bîr tînin. Her wiha tevahiya gelên ku ji bo parastina zimanê xwe yê dayikê têdikoşin silav dikin.
Ji salekê zêdetir e ku Sûriye bi temamî, Rojavayê Kurdistanê jî di nav de, derbasî qonaxeke nû bûye. Ji wan mijarên sereke yên vê qonaxê, yek jê mijara zimanê Kurdî ye ku li ser maseya danûstandinan e û cihê wî, di Sûriyeya nû de tê guftûgokirin. Di vê çarçoveyê de girîng e ku em, biryarnameya 13’emîn a Serokê Sûriyeyê yê demkî Ehmed El-Şera, bi bîr bixin. Bi vê biryarameyê, cara pêşîn e ku di dîroka Sûrîyeyê de, zimanê Kurdî qonaxa tunedîtinê derbas dike û bi awayekî fermî tê naskirin.
Her çiqas ji aliyê sembolîk û dîrokî ve gaveke erênî bê nirxandin jî, lê ev biryarname, mafên zimanî yên gelê Kurd misoger nake. Ji bo ku wekî destkeftiyeke mayînde bê parastin, pêwîst e zimanê Kurdî weke ‘zimanê fermî’ di destûrê de bê naskirin û mafê perwerdeya bi zimanê dayikê weke mafekî rewa û bingehîn bê misogerkirin. Lewra zimanê gelê Kurd ku li ser axa xwe ya dîrokî dijî, ji wê çendê mezintir e ku wekî ‘zimanekî niştimanî’ bê pênasekirin.
Ji bo misogerkirina mafên ziman ên rewa û parastina destkeftiyên şoreşa ziman a Rojavayê Kurdistanê, em ê bi hemû hêza xwe û ji her hêlê ve kar û xebatên xwe bidomînin û li doza zimanê Kurdî, weke dozeke neteweyî ya pîroz, xwedî derkevin. Ji bo bicihanîna vê armancê, em ji gelê xwe yê li çar parçeyên Kurdistanê û diasporayê jî hêvi dikin ku doza zimanê Kurdî, weke dozeke miletî û neteweyî bide pêş û bi her awayî, xweditîyê lê bike.”
