Yek ji fermandarên Yekîneyên Rojhilatê Kurdistanê (YRK) Çiya Mahabad têkildarî jiyan û têkoşîna gerîla Êriş Berxwedan ê ku 3’ê Kanûna 2023’an di êrişa dewleta Tirk de li Pênciwinê şehîd bû, ji ANF’ê re axivî. Çiya Mahabad bi vî rengî qala têkoşîna Êriş Berxwedan kir:
‘’Di destpêkê de em li ser navê Hêzên Rojhilatê Kurdistanê (HRK) ji malbata hêja û gelê me yê Kobanê re sersaxiyê dixwazin. Di şexsê heval Êrîş de em bejna xwe li hemberî hemû şehîdan ditewînin. Ji bo zîndîkirina bîranînên wan û pêkanîna armancên wan em soza xwe ya bilindkirina têkoşînê dubare dikin.
Heval Êriş, weke ciwanekî ji Kobanê ku berxwedaniya xwe û têkbirina çeteyên DAÎŞ’ê navê xwe li seranserê cîhanê belav kir, ji roja beşdarbûna xwe û heya roja şehadeta xwe ku me bi hev re li qada Rojhilatê Kurdistanê têkoşîn meşand, bi wî ruhî, bîr û bawerî û sekna berxwedêr tevlî Yekîneyên Rojhilatê Kurdistanê (YRK) bûbû. Heval Êrîş, li derdora xebatên me yên li qadê kar dikir. Di warê teknîkî de pispor bû. Bi rastî jî ji teknîkên di destê me de fêm dikir û her tim hewl dida ku wan bi awayekî serkeftî bi kar bîne û nedihişt di kar û xebatên hevalan de ên têkildarî parastin û jiyanê pirsgirêk rû bidin. Bes ne di warê teknîkî de pêşketî bû di heman demê de bi qasî wî aliyê xwe jî di warên jiyan, hevaltî, hezkirina hevalan û tevlîbûna şoreşê de jî ciwanekî bêhempa bû. Heval Êrîş, xwe deyndarê gelê Rojhilat jî didît. Gelek caran me pêre nîqaş dikir û wî jî digot ku gelek ciwanên ji Rojhilat hatin û li Rojava û Kobanê şehîd ketin. Ez jî weke ciwanekî ji Kurdistanê bi wan hest û ruhê neteweyî girêdayî bîranîn û wefedariya wan şehîdan dixwazim li Rojhilatê Kurdistanê têbikoşim. Bi qasî ku li qada Başûr xwedî hewl û ked bû û hewl dida xwe di warê leşkerî û îdeolojî de pêş bixe, di heman demê de ew qasî hewl dida ku biçe Rojhilatê Kurdistanê û li wir li qadên gerîlayan pratîk bimeşîne.
Li ser vî esasî bi taybetî di branşa sekvaniyê de ku di taktîka gerîlayan de branşeke girîng e, perwerdeyên leşkerî standin. Perwerdeya wê branşê dît û xwe amade dikir û pêşniyar kir ku biçe pratîkê. Lê belê ji ber ku hewcehî hebû me demekê ew di xebatên wî yên berê de da sekinandin. Her wiha ew xebatên xwe jî domandin û tu caran negot ku pêşniyara min heye û ev karekî dubare ye. Yanî nêzîkatiyeke cuda nîşan neda. Heval Êrîş li ser esasên weke pêwîstiya rêxistinê û valahiya li qadan xwe berpirsiyar didît û tevlî kar dibû. Bi rastî karê ku dikir paqij bû. Ez dikarim bibêjim ku ruhê Kobanê di kesayeta xwe de berceste kiribû. Ew ruh û îradeya gelê Kobanê ku bi salan weke qad û navendeke têkoşîna rizgariya gelê Kurdistanê bû, di kesayeta xwe de pêk anîbû. Tim ew mezin dikir û wisa dijiya. Heval Êrîş, di pratîkê de hevalekî berçav bû û kesekî bêhempa bû. Li ku derê kar, pêwîstî û pirsgirêk hebûna berê xwe dida wir û bi awayekî xurt li ser wan disekinî û ew çareser dikirin. Tim hewl dida ku xwe di warên perwerde, pratîk, teknîk, zanistiya teknîkî, fêrbûn û lêkolînê de xwe pêş bixe. Nedigot ku ez vê yekê dizanim, ev têra min dike û bes e. Di nava çend salan de me pêşketinên heval Êrîş bi xwe dît. Xwe gihandibû asteke wisa ku dikarî di çend qadên cuda de kar bide meşandin û pêşengiyê bike. Her wiha girêdayî pêşniyara xwe tim bi kelecan û bi biryar bû ku biçe hundir û pratîk bimeşîne. Ji Şaho bigirin heya Ûrmıye û Makûyê. Daxwazeke heval Êrîş ya bi vî rengî hebû. Lê belê mixabin şehadeta heval Êrîş rê neda ku ev xwestek û hêviya wî pêk were û biçe pratîkê.
Weke hevalên wî emê tim girêdayî bîranînên wî nêzîkî pratîkê bibin. Em ê nehêlin xeyalên wî û hemû hevalên wî yên şehîd li erdê bimînin. Bi awayekî teqez ev biryardariya me û soza me ya ji şehîdan re ye. Em di baweriyê de ne ku ger heval şehîd nebûna ew tiştên ku li qadên dikir wê bi awayekî mezintir li hundir jî bikirana û ser bixistana. Wê bigihîşta asta fermandarekî mezin û gerîlayekî pisportir.
Dagirkeriya Tirk di 3’yê Kanûna 2023’yan de bi balafirên bêmirov êrîşeke hewayî pêk anî. Di encama wê êrîşê de li gel heval Aryen gihîşt şehadetê. Heval Êrîş, bi wî rengî gihîşt asta şehadetê. Dewleta Tirk dema ku heval li ser erka xwe li dijî hevalan êrîşeke nemerdane pêk anî. Mixabin ku di encama wê êrîşê de heval Êrîş gihîşt şehadetê. Em dikarin têkildarî şehadeta heval Êrîş Berxwedan bibêjin ku ew ji bo Rojava û gelê me yê Kobanê ku ji bo hemû welat û Kurdistanê bûye sembol, ji bo gel û gerîlayên Rojhilatê Kurdistanê jî cihekî girîng ê Kobanê û Rojava heye ku weke dînamîk û hêzeke pêşeng û ruhekî ku têde berxwedan heye û azadî çêbûye, sekn û îradeyekê sembol e û heval Êrîş jî zarokê wê herêmê ye. Weke gelê Rojhilat û hevalên wî yên ji Rojhilat em tu caran wî ji bîr nakin. Wê tu caran cihê wan di xebat û têkoşîna me de vala nemînin.
Weke rêhavalên heval Êrîş Berxwedan em dikarin vê sozê bidin gelê xwe yê Rojava, Kobanê û malbata heval Êrîş ya hêja. Divê bi kurê xwe, zarokên serbilind bin ku wisa bi serbilindî diçin qadên din ên welat û beşdarî Tevgera Azadiyê dibin ku ew jî hat beşdarî tevgera me ya Rojhilat PJAK’ê bû û li wir heya roja şehadeta xwe xebat dan meşandin û bi serbilindî jî erkên xwe bi cih anîn. Bila malbat jî bi vî zarokê xwe yê hêja, qehreman û dilsozê welat serbilind be. Heval Êrîş jî weke hemû hevalên şehîd erkên xwe pêk anîn û wisa tevlî karwanê şehîdan bû. Her çend şehadet ji bo giran in û bêguman her windahiyek li gel me dibe sedema rûdana êşeke mezin. Weke ku Rêbertî dibêje, parçeyekî ji beden û laşê me diçe. Bi rastî jî wisa ye û ev yek heqîqetek e.
Lê belê ji bo armancên mezin, destkeftiyên mezin, welatekî azad û Kurdistaneke azad çawa ku me li Kobanê bi hezaran şehîd dan û ji her beşên welat hatin û beşdar bûn. Li Rojhilatê Kurdistanê jî bedêlên giran hatine dayîn û pêwîst bike wê ji vir û pê ve jî hê werin dayîn. Ev têkoşîn û rêwîtî bi beşdariya hemû keç û xortên ji beşên welat wê li Rojhilat çêbibe û çêdibe jî. Ev yek a niha jî heye û wê ser bikeve. Em di wê baweriyê de ne ku heya leheng û qehremamên weke heval Êrîş hebin bu guman wê ser bikeve. Wê tu caran çekên wan, alên wan û fikra ku di oxira wê de meşiyan û gihîştin şehadetê jî winda nebin, li erdê nemînin û tune nebin. Serketin wê ya me gelê Kurd be.
Çawa ku Kobanê di şexsê gelê Kurd de ji cîhanê re serketin afirand, wê li Rojhilat jî Kobanê bibe bingeheke serketina Rojhilatê Kurdistanê û beşên din ên welat. Wê ruhê Kobanê wê li Rojhilat jî zindî were girtin. Em ê li gel hevalên weke heval Êrîş ruh û berxwedaniya Kobanê zindî bigirin. Heval Êrîş zarokê wê berxwedanê bû ku hat û heya roja dawîn jî beşdarî têkoşîna li qada Rojhilat bû. Bû gerîlayekî YRK’ê û xebat dan meşandin. Weke rêhevalên wî em careke din bejna xwe li hemberî bîranînên wî ditewînin û ji Rojhilatê Kurdistanê rêz û silavên xwe ji Rojava û bi taybet jî ji gelême yê Kobanê re pêşkêş dikin û dibêjin ku Bijî Serok Apo, şehîd namirin û şehîd namirin.’’
