KURDÎGEH’ê, têkildarî zarokistan a bi navê “Perperok Mala Zarokan” ku ji aliyê qeyûm ve tabelaya wê hatiye guhertin, li Kolana Hunerê ya li navçeya Rêya Armûşê ya Wanê daxuyaniyek da. Di daxuyaniyê de pankarta “Zimanê Kurdî xeta me ya sor e destê xwe jê vekişînin” hat vekirin û dirûşmeyên “Bê ziman jiyan nabe”, “Ziman jiyan azadî”, “Bê kurdî jiyan nabe” hatin berzkirin. Parlamenterên DEM Partiyê, Hevşaredarên Bajarê Mezin ên Wanê Neslîhan Şedal û Abdûllah Zeydan, endam û rêveberên partiyên siyasî, nûnerên saziyên sivîl û partiyên siyasî tevlî daxuyaniyê bûn.
Metna daxuyaniyê ji hêla rêveberê KURDÎGEH’ê Alî Ataman ve hat xwendin.
Rêveberê KURDÎGEH’ê Alî Ataman anî ziman ku qeyûmê faşîst li dijî zimanê Kurdî êrîşeke hov kiriye û got: “Tabelaya zarokxaneya bi navê Perperokê ku şaredariya DEM Partiyê daliqandibû, ji aliyê qeyimê faşîst ve hat rakirin. Helbet armanc û hewldana qeyûman ew e ku di çarçoveya polîtîkayên desthilatdariyê de bi rengekî hovane zimanê Kurdî li her derê ji holê rakin û zarokên Kurd bikin Tirk. Qeyimê faşîst, diz û talanker ê şaredariya bajarê mezin, bi vê kiryara xwe careke din nîşan daye ku dijminîtiya neteweya Kurd û zimanê Kurdî dike.”
‘OCALAN ZIMANÊ DAYIKÊ JI AVÊ GIRÎNGTIR DIBÎNE’
Alî Ataman bal kişand ser pêvajoya “Aştî û Civaka Demokratîk û wiha berdewam kir: “Rêzdar Abdullah Ocalan zimanê dayikê ji nan û avê girîngtir dibîne; ji bo aştiyeke rast, azadî, serbestî û wekheviya hemû ziman û nirxên netew û koman ên civakî û dîrokî diparêze.”
Alî Ataman destnîşan kir ku zimanê Kurdî ji bo Kurdan xeta herî sor û jêneger e û axaftina xwe wiha bi dawî kir: “Mafên zimanên din çi bin mafên zimanê Kurdî jî ew in. Em careke din destnîşan dikin ku heta zimanê Kurdî ji aliyê hiqûqî û siyasî ve nebe xwedî statu, nebe zimanê perwerdehiyê, hemû astengiyên zagonî û kiryarî yên li pêşiya zimanê Kurdî ji holê neyên rakirin, hemû navên ku berê Kurdî bûn paşê kirine Tirkî li Kurdî neyên vegerandin, aştiyeke rast û civateke demokratîk pêk nayê.”
BANGA XWEDÎDERTÊKETINA LI KURDÎ
Ataman diyar kir ku divê têkoşîn hîn bêtir were bilindkirin û hemû sazî jî mil bidin vê têkoşînê û wiha axivî: “Banga me ji bo gelê Kurd û derdorên ji bo mafên mirovan hestiyar e; ji bo parastin û pêşxistina zimanê Kurdî, di her qadê de têkoşîn û xebatên xwe zêde bikin, her derê bikin mal, kargeh, dibistan û zanîngehên Kurdî. Qadên jiyanê yên Kurdî berfireh bikin.”
‘DIVÊ ZIMANÊ KURDÎ BÊ MISOGERKIRIN’
Piştî daxuyaniyê hevşaredara Bajarê Mezin a Wanê Neslihan Şedal diyar kir ku heta ew bi zimanê xwe nejîn dê berxwedana wan bidome û ev tişt got: “Divê her derê Wanê bi zimanê Kurdî bê xemilandin û divê Kurdî li her qadên Wanê Kurdî bibe zimanê jiyanê. Heke aştiyek çêbe, heke ev pevajo ser bikeve, divê pêşî zimanê Kurdî bê nasîn û bê misogerkirin.”
Daxuyanî bi çepikan bi dawî bû.
