Di çarçoveya şermezarkirina dorpêç û êrîşên li dijî taxên Şêxmeqsûd, Eşrefiyê û Benî Zêd ên Helebê ên komên hikumeta demkî ya Sûriyeyê pêk tînin, Kombenda Efrîn a Civakî, Rêveberiya Kar û Barên Koçberên Efrîn-Şehba yên Qamişloyê, Rêveberiya Kar û Barên Koçberên Efrîn-Şehba ya Amûdê û Meclisa bajarê Girkê Legê yê kantona Cizîrê daxuyanî dan.
Di daxuyaniyan de hat diyarkirin ku tedbîrên ewlehî û aborî yên li dijî taxên Şêxmeqsûd û Eşrefiyê û êrîşên li dijî wan taxan, bi xwe re bandorên mirovî yên xeternak tînin.
Hat destnîşankirin ku pêwîstî bi avêtina gavên pratîkî û rasterast heye ku ev dorpêça li ser wan taxan bê rakirin, êrîş rawestin û sedemên nakokiyê çareser bibin.
Di daxuyaniyan de hat gotin ku ji mafê koçberên Efrînê ye ku bi awayekî dilxwazî, ewle û rûmet vegerin herêmên xwe û bi xwe herêmên xwe bi rê ve bidin.
Di daxuyaniyan de hişyarî li ser bandorên xeternak ên li ser jiyana welatiyan û mafên wan hat dayîn.
Di daxuyaniyan de bang li rêxistinên civaka sivîl, desteyên hiqûqî, hêzên demokratîk û jinan li Sûriyeyê hat kirin ku hevkariya xwe xurt bikin, piştgiriyê bidin mafên mirovan, nirxên edalet û hemwelatîbûna wekhev bi cih bînin, divê ev êrîş tavilî werin rawestandin û welatiyên li taxên dorpêçkirî werin parastin.
