Esreen Ghadri diyar kir ku Serokê Dewletên Yekbûyî yên Emerîkayê (DYE) Trump di dema ku şer herî dijwar de ji nişka ve lûtkeya G7 terikand, derbasî navenda krîzê ya li Qesra Spî bû, ev yek bi eşkere diyar dike ku di amadekariyê de bû ku Emerîka li dijî Îranê gaveke leşkerî û dîplomatîk a tund bavêje. Esreen Ghadri destnîşan kir ku piştî vê gavê hate ragihandin ku wê li herêmê balafirên bombebaranê yên B-52 bên bicihkirin û vê yekê nîşan da ku DYE, Fransa û Îngilistan ji bo teslîmgirtina Îranê li qadê û li ser maseyê amadekariyên xwe bi rengekî zelal bi lez kirin.
Esreen Ghadri ragihand ku ev hêz naxwazin dewleta Îranê bi temamî hilweşe û got, “Hêzên Rojavayî Îraneke demokratîk naxwazin. Rojava wê kontrol bike; Îraneke di aliyê leşkerî de bêbandor, di aliyê siyasî de serbixwe û ji bo razemeniyên derve yên ekonomiyê, bi taybetî ji bo sektorên enerjî û binesaziyê vekirî dixwaze.
‘RÛSYA Û ÇÎN WÊ TEVLÎ NEBIN, WÊ LI PIŞT PERDEYÊ BI RÊ VE BIBIN’
Esreen Ghadri pêşbînî dike ku Rûsya û Çîn wê weke leşkerî rasterast tevlî vê pêvajoyê nebin û anî ziman ku her du welêt ne alîgirê kaosa heyî ne, alîgirê avakirineke jinûve ya birêkûpêk û hatî rêvebirin in. Esreen Ghadri wiha dewam kir:
“Ew edaletê naxwazin, nifûzê dixwazin. Peymanên jinûve avakirinê, çek û enerjiya li Îranê; nîşan dide ku Rûsya û Çîn naxwazin ev rejîm bi temamî hilweşe, difikirin ku wê ji çêkereke lewaz lê li ser piyan mayî sûd bigirin.”
Esreen Ghadri îdîa kir ku ev her du aktor bi hin peymanên veşartî nerasterast tevlî pêvajoyê bûne û ev şîrove kir: “Daşkandina gumrukê ya li ser Çînê, sernavên mîna bazariyên Ukrayna û Rûsyayê, parçeyekî hevkariya bêdeng a di dosyaya Îranê de ye. Wê rasterast tevlî şerê Îsraîl-Îranê nebin; lê belê wê li pişt deriyên girtî tevlî vê pêvajoyê bibin.”
‘ŞERÊN ENERJIYÊ WÊ DIYARKER BIN’
Esreen Ghadri diyar kir ku geşedanên diqewimin ne tenê li Îranê, di asta kûreyî de guhertineke paradîgmayê ye û got, “Rewşa niha diqewime, ne hilweşîna dîplomasiyê, hilweşîna asta navneteweyî ye ya ku piştî Şerê Cîhanê ya Duyemîn hate avakirin û xizmetê ji berjewendiyên gelên herêmê re nake. Şerekî Sar ê Nû destpê dike lê vê carê ne îdeolojî; wê xwe gihandina çavkaniyên enerjiyê, rêyên bazirganiyê û kontrola herêmî diyarker be.”
Esreen Ghadri destnîşan kir ku hiqûqa navneteweyî êdî tenê bûye ‘qilifikek’ û axaftina xwe wiha domand: “Emperyalîzmên roja îro cil û bergên taxim li xwe dikin. Sînoran jinûve xêz dikin, tifaqên nû çêdikin û rejîmên siberojê bi taslakên NY’ê diyar dikin. Sykes-Pîcot car din li ser dikê ye; tenê rêbaz û tiştên sereke hatin guhertin.”
‘PJAK WÊ XWEDÎ LI GELÊ ME DERBIKEVE’
Esreen Ghadri bilêv kir ku ev pêvajo ji bo Kurdên li Îranê demeke girîng e û diyar kir ku bi hilweşîna rejîma Îranê re wê siyaseta Kurd rû bi rûyê berpirsyariyeke dîrokî bimîne. Esreen Ghadri ev tişt gotin: “PJAK ji bo parastina gelê Rojhilat pêdivî bi destûra ti kesê nabîne. PJAK weke siyasî, leşkerî û îdeolojîk amade ye siberojeke azad û demokratîk ava bike. Em dizanin ku PJAK wê bi her awayî xwedî li gelê me yê li wir derbikeve.”
Esreen Ghadri destnîşan kir ku çêkerên din ên siyasî yên Kurd ji bo vê berpirsyariya dîrokî bi cih bînin, divê di nava hewldanê de bin û bang li Partiya Demokrat a Kurdistanê-Îran (PDK-Î) û tevgera Komala ya di bin serokatiya Abdullah Mohtada de kir û wiha dewam kir:
“Hilweşîna rejîmê yan jî jinûve avakirina wê, kêlî bi kêlî pêk tê. Ev, ji bo Kurdan ne sembolîk, dema yekîtiyeke stratejîk e. Eger PDK-Î û Komala liv û tevgera xwe ya ji hêzên Kurd qut dewam bike –yan jî hîn xirabtir, ji bo xwe bi hêzên derve bide qebûlkirin pozîsyon diyar bike- xiyanetên dîrokî yên li hemberî gelê Kurd wê car din xwe dubare bikin. Ev, ne tenê windahiyên dîrokî, xeteriyek e ku wê azadiya me ya siberojê jî asteng bike.”
‘GELÊ KURD SIYASETEKE KU NE BERJEWENDIYÊN PARTIYÊ, RÛMETA GEL DIKE PLANA XWE YA SEREKE DIXWAZE’
Esreen Ghadri bal kişand ku gelê Kurd ê li her çar parçeyên Kurdistanê, pêvajoyê ji nêz ve dişopîne û ev tişt ragihand:
“Êdî ti hincet nayê qebûlkirin. Ji bo derengmayînê ti sedem nîne. Di parçebûnê de siberoj nîne. Gelê Kurd siyaseteke ku ne berjewendiyên partiyê, jiyan, rûmet û mafê gel a diyarkirina qedera xwe dike plana xwe ya sereke dixwaze.”
Esreen Ghadri siyaseta ku gelê Kurd ê li Îranê nîşan bide jî wiha pênase kir:
“Ne bi lihevkirina bi rejîmê re, ne jî bi qebûlkirina senaryoya Rojava re azadî pêk tê. Azadiya Kurd li dijî rejîmê û hêzên derve yên ku hewl didin Kurdistanê bêyî me dîzayn bikin, bi sekneke yekgirtî dibe.”
