Ewladê leheng ê Çewlîkê hevrê Mordem (Bûlût Kîşîn) zarokatiya wî li nava malbeteke welê derbas bû ku welatparêz bû, berdêl dida û timî li zextên giran ên dewletê rast dihat. Hevrê Mordem ji şehadeta du apên xwe yên li nava refên Têkoşîna Azadiyê ya Kurdistanê gelekî bi bandor bûbû.
Malbata wî li ber zext û zilma dewleta faşîst a mêtinger rabû û ev yek jî bû sedem ku hevrê Mordem hîn di temenekî biçûkanî de bibe xwedî hest û hêrsa serhildêriyê. Derdora ku hevrê Mordem lê mezin bû derdoreke welê bû ku ji Têkoşîna Azadiyê ya Kurd bi bandor bûbû. Vê yekê jî rêya wî ya jiyanê diyar kir.
Kesayetiya hevrê Mordem di nava van şert û mercan de ava bû û bi sekna xwe ya fedakar û bi îrade hem li nava malbata xwe hem jî li nava derdora xwe bû cihê hezkirinê. Hevrê Mordem ku li dibistanê gelekî serketî bû piştî ku lîse qedand derfet dît ku li yek ji zanîngehên bijarte yên Tirkiyeyê bixwîne, lê belê wî berê xwe da Kurdistanê, Zanîngeha Dîcleyê tercîh kir. Gava ku li Zanîngehê dixwend weke yek ji kadroyên sereke yên karên ciwanên xwendekar ên welatparêz di nava hevalên xwe de bû kesayetekî pêşeng.
Sala 2004’an ji bo bersivê bide pêngava 1’ê Hezîranê li gel komek ji hevalên xwe weke Mertalên Zindî xwe gihand qadên azadiyê. Piştî dewreya perwedeyê ya şervanên nû ji bo pêkanîna xewn û xeyalên xwe, beşdarî nava refên gerîla bû.
Hevrê Mordem ku di demeke kurt de li nava hevrêyên xwe hemûyan hate hezkirin, bi sadebûn, durustî, sekna xwe ya xwezayî û jêhatîbûna xwe bal kişand ser xwe. Ji dema destpêkê ya jiyana xwe ya gerîla û pê ve li rêxistinê ferz kir ku biçe qadê herî zehmet. Ji bo wî Têkoşîna Azadiyê ya Kurdistanê dihate wateya serxistina karê herî zehmet.
Di encama vê daxwaz û israrê de derbasî qada Amanosan bûn. Nêzî çar salan li vê qadê bi rengekî bê eman tevlî pratîka şer bû û xwe kir gerîlayekî şareza ku karibe li her qadê wezîfeyê bike.
Dema ku li Amanosan bû ji ber ku ji malbata xwe gelek şehîd da, rêxistinê xwest hevrê Mordem li qadên hîn ewle bi cih bike. Lê belê hevrê Mordem ji ber hêrsa xwe ya li hemberî dijmin her tim xwest li eniya herî pêş be û li ber dijmin bisekine. Hêrsa wî ya li dijî dijmin xwedî wê hêzê bû ku dikarîbû mîna lehiyekê her tiştên derkeve pêşiya xwe ji holê rake.
Her ku ev hêrsa hevrê Mordem bi têgihişt û tecrûbeya pratîkê re bû ye, veguherî fermandarekî welê ku li her qadê derbê li dijmin bixe, di xeta serketinê de xeta fermandariyê ya Apoyî temsîl bike.
Ji sala 2022’an û pê ve li hemberî êrîşên artêşa Tirk a faşîst a mêtinger ên li hemberî Herêmên Parastinê yên Medyayê hevrê Mordem weke yek ji fermandarên êrîş û berxwedanê yê bijarte yê eniya gerîla, bi hunera xwe ya taktîkî û jêhatîbûna xwe ya fermandariyê mohra xwe danî binê gelek çalakiyên serketî ku derbên giran li dijmin hate xistin. Li herêma Zapê dijmin asê kir û welê lê kir ku nikaribe xwe bilivîne.
Bi vî rengî weke fermandarê fedaî yê Eniya Şehîd Delîl çar salan li herêma Zapê têkoşîneke bêhempa meşand; bû pêşengê dîrokî yê îradeya nayê şikandin û ruhê fedaî yê Apoyî yê têk naçe. Gotin û pratîka xwe yek bû, bû fermandarekî pêşeng ku hêjayî kevneşopiya berxwedanê ya gel û malbata xwe ya welatparêz bû.
Mixabin di encama qezayeke bêşens de hevrê Mordem şehîd bû, ku vê yekê hevrêyên wî gelekî êşand. Ji ber jidestdana ewladê zêrîn ê têkoşîna me û Kurdistanê em ji dil diêşin; dibêjin ku em ê dilsozê bîranîna wî bin û êşa malbata xwe ya hêja û gelê xwe ji dil parve dikin.
