Paketa Darazê ya 10’emîn ku demeke dirêj dihate hêvîkirin û bendewarî jê dihate kirin ku reforman bike, wê îro pêşkêşî Civata Giştî ya Meclîsê bê kirin. Tê gotin, naveroka paketê bersivê nade bendewariyan û xeyalên mezin ên civakê şikandiye.
Parêzvana mafên mirovan Fatma Bostan Unsal nerazîbûn nîşanî helwesta hikumetê da ku têkildarî paketa darazê di kêliya dawî de guhertin kir. Fatma Bostan Unsal ji ANF’ê re axivî û destnîşan kir ku sererastkirina dihate hêvîkirin nehate kirin.
Fatma Bostan Unsal ragihand ku ji gavên pêvajoya nû wêdetir pêwîstî bi sererastkirinekê heye û got, “Ji ber ku girtîgeh zêde qelebalix e û di mijara sûdwergirtina ji sererastkirina înfazê ve rewşeke newekhev heye, di vê mijarê de pêwîstiyeke mezin bi sererastkirinê hebû.
Li gorî Komeleya Civaka Sivîl a li Sîstema Înfaza Ceza (CÎSST) kapasîteya hemû girtîgehên Tirkiyeyê 299 hezar û 924 kes e, lê niha 409 hezar û 617 mehkûm hene. Ji ber ku ev zêdehî li her deverê bi rengekî wekhev nayê belavkirin, li hin koxûşan bi 2-3 qatî zêdeyî kapasîteya xwe girtî têne ragirtin.
Her wiha guhertina înfazê ya di dema şewba koronayê de rê li ber berdana mehkûmên edlî vekir, dihate hêvîkirin ku mehkûmên siyasî jî bikevin ber vê guhertinê. Lewma hêvî ew bû ku sererastkirina înfazê ya ji ber pêvajoya nû bihata kirin, van hemûyan li ber çavan bigire.
Di vê demê de ku bendewariyên li ser pêvajoya nû zêde bûne, ev sererastkirina ku tenê bi mehkûmên nexweş û extiyar re bi sînorkirî hate hiştin, bersiv neda bendewariyan.”
‘DIVÊ DEST JI ZIMANÊ CIHÊKAR BÊ BERDAN’
Fatma Bostan Unsal anî ziman ku nerazîbûna li hemberî paketa darazê normal e, lê belê wê şikestineke mezin bi xwe re nîne û destnîşan kir ku divê dest ji zimanê cihêkar bê berdan.
Fatma Bostan Unsal got, “Ne bawer im ku ev paket şikestinekê bi xwe re bîne. Hêviya bi hezaran girtiyên li benda berdanê şikestî jî be, bi sererastkirineke nû ya meha Îlonê bê kirin re encama ji vê sererastkirinê dihate hêvîkirin bi derengî jî wê pêk were.
Her wiha guhertin an jî rakirina Qanûna Têkoşîna li dijî Terorê di rojevê de ye. Bêguman ev hemû ji ber xwe ve nabe; aliyên ku guhertinê dixwazin divê bi sebir be û bikevin nava hewldanên dûrî ji cihêkariyê.”
