Fermandara YPJ’ê Şîlan Kobanê (Leyla Îsa) ku di 2’yê Adarê de li bajarê Hesekê şehîd bibû û şervanê Hêzên Komandosê Karker Kabanê (Bangîn Nasan) ku di 18’ê Çileyêde li Dêrezorê şehîd bibû, li Pakrewangeha Şehîd Dîcle ya Kobanê bi merasîmeke girseyî hatin veşartin.
Merasîma ku bi sedan kes tevlî bû, bi deqeyeke rêzgirtinê dest pê kir. Piştre Hevserokê Meclîsa Malbatên Şehîdan a Bajarê Kobanê Mihemed Bozî axivî û got: “Em bi saya şervanan li vir in, ew şervanên ku canê xwe ji bo doza me ya azadiyê dan. Îro em bi saya şehîdan û Rêber Apo li vir in û em ê li vir bin.”
Piştre yek ji rêvebera Asayîşê Arîn Kobanê axivî û got ku ew ê heta dawiyê xwedî li xeta şehîdên xwe derkevin û wiha got: “Berxwedana ku Şîlan û Karkeran kir, berxwedaneke efsanewî ye. Her roj em şehîdên xwe dispêrin axa xwe ya pîroz, heta ku gelê me yê ji bo rûmet û azadiya xwe li ser pêyan be, wê zarokên wan ên qehreman hebin.”
Piştre nasnameyên her du şehîdan hatin xwendin û wesîqeyên wan radestî malbatên wan hatin kirin.
Cenazeyên her du şehîdan li gel berzkirina dirûşmeyan hatin veşartin.
