Di salvegera 28’emîn a komploya ku 9’ê Cotmeha 1998’an a ji aliyê hêzên navneteweyî ve li ser Rêber Apo hatiye pêkanîn de Endamê Înîsiyatîfa Azadiya Rêber Abdullah Ocalan a Sûriyeyê Ferzende Mûnzûr ji ANF’ê re axivî.
Ferzende Mûnzûr di destpêka axaftina xwe de di şexsê Şehîd Xalid Oral û Aynûr Artan de hemû şehîdên ku ji bo doza azadiyê canê xwe feda kirine, bi bîr anî û got: ‘’Di warê jeosiyasî de guhertineke mezin di rewşa komployê de hatiye kirin. Her wiha têkiliyên berbiçav ên weke têkiliya Tirkiye û Îsraîlê, ev hêz di wê demê de bi hemû hêza xwe tevlî komployê bûn. Lê belê niha ev rewş hate guhertin.’’
’GUHERTINA LI ROJHILATA NAVÎN’
Ferzende Mûnzûr di nav axaftina xwe de diyar kir ku rewşa komployê piştî pêvajoya buhara gelan û Şoreşa Rojava hate guhertin û wiha axaftina xwe domand: ‘’Li Rojhilata Navîn bi giştî guhertinek di rewşa siyasî de rû da, piştî pêvajoya buhara gelan, Şoreşa Rojava û bi destpêkirina têkoşîna gelê Kurd re gavên mezin hatin avêtin. Piştî 2010’an prensîbên ku NATO’yê dabûn Tirkiyeyê, xwe dan milekî. Tirkiye, bi rêveberiya Erdogan re zêdetir ber bi hişmendiyeke Îslamî ve çû ku heta lêgerîna vegera fikra Osmanî dihate kirin. Li ser vî esasî têkiliyên Tirkiyeyê bi tevgerên Îslamî ên radîkal û bi taybet jî bi îxwanan re pêş ketin.’’
‘RÊBER APO SEMBOLA AZADÎ, AŞÎTÎ Û DEMOKRASIYÊ YE’
Ferzende Mûnzûr di berdewamiya axaftina xwe de qala têkoşîna gelê Kurd a li dijî hêzên hegemon û komployê kir û ev yek anîn ziman: ‘’Li kêleka van bûyerên ku hatine qalkirin, gele Kurd têkoşîna xwe a rewa ya ji bo demokrasî û aşitiyê ya bi pêşengtiya Rêber Apo dan meşandin. Her wiha nameyên aşitiyê yên ku ji Îmraliyê tên, bandoreke mezin kirin. Rêber Apo, bi felsefe û ramanên xwe yên neteweya demokratik û konfederalîzma demokratîk, li seranserê cîhanê weke semboleke azadî, aşîtî û demokrasiyê tê naskirin û qebûlkirin.’’
‘BANGA AŞTÎ Û CIVAKA DEMOKRATÎK’
Mûnzûr piştre bal kişand ser bandora Banga Aşitî û Civaka Demokratîk a li ser cîhanê û got: ‘’Dema ku Rêber Apo di 27’ê Sibatê de Banga Aşitî û Civaka Demokratik kir. Me dît ku çawa li seranserê cîhanê û bi taybet jî ew hêzên ku di komployê de cih girtibûn, piştgirî dan vê bangê. Her wiha roja îroyîn û bi taybet jî piştî 7’ê Cotmehê, careke din li her çar parçeyan de û li Rojhilata Navîn gelê Kurd roleke stratejîk dilîze û di guhertin û îstîkrara Rojhilata Navîn de cih digire’’
‘DIVÊ TIRKIYE GAVÊN BER BI ÇARESERIYÊ VE BIAVÊJÊ’
Ferzende Mûnzûr piştre bal kişand li ser gavneavêtina Tirkiyeyê yên têkildarî çareseriyê û wiha got: ‘’Rêber Apo, têkildarî pêvajoya çareseriyê gavên dîrokî avêtin û weke rêveberê vê pêvajoyê tê dîtin. Lê belê Tirkiyeyê sozên ku ji bo pêvajoyê dane hîn pêk neanîne. Yek ji gavên girîng û fedekarî ên ku Rêber Apo avêtine, fesihkirina PKK’ê bû û şewitandina çekan bû. Ev ji bo pêvajoyê nameyên xurt bûn û diviyabû Tirkiyeyê jî bi cesaret û gavên ber bi çareseriyê ve biavêtana. Lê belê heta niha bi tene komisyonek hatiye avakirin. Divê ev komisyon bi Rêber Apo re hevdîtinan pêk bîne. Lê belê heta niha ev yek nehatiye kirin.’’
‘NÊZÎKATIYÊN TIRKIYEYÊ NE CIDÎ NE’
Mûnzûr diyar kir ku ev nêzîkatiyên Tirkiyeyê cidiyet û jidiliya wê ya li hemberî pêvajoyê diyar dikin û got: ‘’Tirkeye li hemberî pêvajoyê ne cidî ye, naxwaze pêvajo ser bikeve. Divê Tirkiye bi awayekî jixwebawer vê dozê çareser bike. Ev şensê wê yê dawîn e. Ger Tirkiye li gorî wê nêz nebe wê li Rojhilata Navîn vî şensî xwe winda bike. Rêber Apo jî ev yek dabû xuyakirin ku eger Tirkiye gav neavêjê wê sed salên din jî nikaribe çareseriyê bîne. Divê Tirkiye dev ji hişmendiya xwe ya komploger, nenaskirin û tunekirinê berde û li şûna wê naskirin, qebûlkirin, çareserî û biratiyê pêş bixe.’’
’KOMPLO DI XELEKA HERÎ LEWAZ DE YE’
Endamê Înîsiyatîfa Azadiya Rêber Abdullah Ocalan a Sûriyeyê Ferzende Mûnzûr di dawiya axaftina xwe de destnîşan kir ku komplo di sala xwe ya 28’emîn de di xeleka xwe ya herî lewaz de ye û got: ‘’Li gel piştgiriya cîhanê ya ji Rêber Apo û gelê Kurd re komplo di sala xwe ya 28’emîn de di xeleka xwe ya herî lewaz de ye. Eger em têkoşîna xwe mezintir bikin, gel bêhtir xwedî li pêvajoyê derkeve û piştgriyê bang û peyamên Rêbertî bên kirin em ê bikaribin pêvajoyê biguherînin û bigihînin serkeftinê.’’
