Li hemberî komkujiyên li hemberî Elewiyên li Lazqiyeyê ji aliyê Heyet Tehrîr El Şam (HTŞ) ve têne kirin, ku Ahmed Huseyîn el Şara bi navê xwe yê naskirî Mûhammed Colanî serkêşiyê jê re dike, rêxistinên Elewiyan ên li Tirkiyeyê li çar aliyên welêt rabûn ser piyan.
Rêxistinên Elewiyan hişyariyê didin desthilatdariya AKP’ê ku ‘Çeteyan rewa dike, Colanî rewa dike’ û bang li raya giştî ya navneteweyî, rêxistinên mafên mirovan û her kesên xwedî wijdan dikin ku li dijî qirkirina Elewiyan bikevin nava liv û tevgerê.
Yek ji siyasetmedarên pêşengên rêxistinên Elewiyan Parlamenterê Partiya Demokrasî û Wekheviyê ya Gelan (DEM Partî) Celal Firat li ser mijarê ji ANF’ê re axivî.
Firat ji rayedarên desthilatdariya AKP’ê yên ku bi gotina ‘Bermahiyên Esad’ hewl didin komkujiyên HTŞ’ê yên li dijî Elewiyan rewa bikin re got, “Bi bêdengmayinê hûn nikarin binixumînin; em li bendê ne ku li ber van komkujiyan, li ber vî sûcê li dijî mirovahiyê rabin.”
Firat bi bîr xist ku piştî HTŞ li Sûriyeyê bû desthilatdar êrîşên li ser Elewiyan gihîştin asta komkujiyê û anî ziman ku Elewiyên li Tirkiyeyê bi fikareke mezin li bûyeran temaşe dikin. Firat diyar kir ku bi taybetî piştgiriya desthilatdariya AKP’ê ya ji bo HTŞ’ê hîn bêhtir Elewiyan dixe nava fikaran û got, “Doh qeymeqamê Şîşlî û polîsan hewl dan asteng bikin ku em li Stenbolê nikaribin çelengê dînin ber Serkonsolosxaneya Sûriyeyê ya li Stenbolê. Ji aliyekî ve qala aştî, xwişk û biratiyê dikin, li aliyê din jî gelan qir dikin. Ev tiştekî rast nîne. Li şûna ku benda polîsan dînin pêşiya me bila li pêşiya komkujiya Elewiyan a li Sûriyeyê bibin asteng.”
‘EM Ê NEHÊLIN KU EV YEK CAREKE DIN RÛ BIDE’
Firat anî ziman ku wê li Hatayê bin, di navbera Hatayê û Lazqiyeyê de 149 kîlometre heye, gelê Antakyayê têkildarî xizmên xwe yên li wê derê bi fikar e û destnîşan kir ku bi gotina ‘Bermahiyên Esad’, ‘Bermahiyên rejîma berê’ kes nikare berpirsyariya komkujiyan ji ser xwe biavêje. Firat got, “Ji me Elewiyan bi salan gotin ‘ji ber şûr mane’, vê yekê têrê nekir, qetil kirin. Em ê nehêlin ku ev yek careke din rû bide. Weke DEM Partî em ê bi gelê Hatayê re bin.”
‘EGER LI MARJÎNALEKÎ DIGERIN BILA LI COLANÎ BINIHÊRIN’
Firat ragihand ku niha li Sûriyeyê hêzek heye ku ji wan heye, eger Elewiyan qetil bikin wê biçin bihuştê û destnîşan kir ku yên piştgiriyê didin vê hêzê, hevparê komkuiyan e. Firat anî ziman ku li Lazqiyeyê, li Tartûsê destdirêjî li jinan hate kirin, zarok hatin qetilkirin û got, “Hevalên me yên li wê derê, dostên me dibêjin, ‘Me ji van çeteyan rizgar bikin’. Bi rastî jî dilê me dişewite. Qeymeqamê Şîşlî ji bo saziyên Elewiyan dibêje, ‘komên marjînal’, eger li yekî marjînal digere bila li Colanî binihêrin ku li qesrê kiribûn mêvan.”
‘AKP BI BÊDEGNMAYINÊ NIKARE BINIXUMÎNE’
Firat destnîşan kir ku weke xelkê Elewî wê li pêşberî vê hovîtiyê bêdeng nemîne û got, “Em vî mejî baş nas dikin. Em baş zanin ku HTŞ bi ya AKP’ê dike. Em ji wê yekê zanin ku bi wan re bi heman wesayitê digerin, bi hev re wêneyan dikişînin, bi hev re nimêj dikin. Lewma desthilatdariya AKP’ê bi bêdengmayinê nikare van komkujiyan, vî sûcê li dijî mirovahiyê binixumîne. Em weke Elewiyan li bendê ne ku li ber vê yekê rabe. Eger ev zilm dewam bike wê Elewî biçe Enqereyê, biçe ber qesrê.”
