8’ê Adarê Roja Jinên Kedkar ên Cîhanê li her devera Kurdistanê, li deşt û bajarên bi coş û heyecaneke mezin ji aliyê jinan ve hate pêşwazîkirin. Li çiyayên Kurdistanê jî li nava refên YJA Starê ev coş gihîşt asteke bilind. Bi vê wesîleyê ji gerîlayên YJA STAR Aryana Baranî Dîcle Serbilind hest û fikrên xwe anîne ziman. Gerîlayan bi dilşadî cejna tevahiya jinan pîroz kirin, gotin ku ew ji sekna jinên tekoşer û berxwedêr ê li her devera cîhanê moral û hêz digirin û ew ê jî li serê çiyayan bi tekoşîna xwe her li pişta wan jinan bisekinin.
Arayana Baran: Di serî de em 8’ê Adarê li Rêberê xwe yê neteweyî li Rêber Apo û li tevahiya jinên cîhanê pîroz dikin. Rêber Apo em kirine xwediyê fikreke wiha ku em hemû rojên salê bikin rojê jinê. Em bi saya wî fikrî bûn xwedî hest, nerîn û zanebûn. Bi vî awayî em xwedî li jiyanê derkevin. Li her devera cîhanê her jineke ku li ber xwe dide, tekoşîn dike, her wiha jinên ku xwedî li azadiya xwe derdikevin û dibine xwediyê dirûşmeya Jin Jiyan Azadî, ev tê wê wateyê ku xwedî li xwebûna xwe derdikevin. Dema em vê dibînin ji bo me dibe çavkaniya hêz û moralê. Îro roj jina ku bi salana êşê ji hişmendiya zilamsalarî dibîne, bûye xwedî vîn û serî radike. Ev sekin ji bo me dibe hêz. Lewra em jî weke gerîlayên jin li çiyayên Kurdistanê li hemberî kirêtî û tarîtiya ku li jinê tê ferzkirin têkoşîn didin meşandin, em vê jî bi hêza fikrê Rêber Apo dikin. Dema hemû jin bi yek reng û dengî bi hev re dakevin qadan û daxwaza azadiya xwe bikin, bêguman wê ev yek misoger bibe. Heya vir bes e ji koletiya li ser jinê re, em naxwazin ti mirov, ti zindî rastî koletiyê were. Ji bo ev pêk were em îro li serê çiyayan di nava hemû mercên zehmet de tekoşîn didin meşandin û gelekî bi heyecanin. Em bi heyecanin ku êdî jiyaneke ayidî me çêdibe, ji ber êdî em xwedî fikrekî rastin ku me ji hemû xeteriyan diparêze. Jinên ku ji bo xwebûna xwe têdikoşin, li himberî desthilatdariya heyî serî natewînin, şîdeta heyî qebûl nakin, em heya dawî li pişta wan jinan e. Li her devera cîhanê her jineke ku êş dikşîne em wê hîs dikin û fêm dikin. Lewra em hemû jinan dawetî qada tekoşînê dikin, da ku bigihijin azadiya xwe. Fikrê Rêberê Apo wê me bibe vê azadiyê. Rêber Apo meşa azadiyê destpê kir, em ê bi hev re vê meşê dewam bikin û bigihînin serî. Lewra ez jinan dawet dikim ku li dora Rêber Apo bibin çember.
Têkoşîna ku heval Sara (Sakîne Cansiz) daye meşandin, bûye bingeha tekoşîna me ya îro. Mîna heval Sara heval Delal, Leyla û Axîn Mûş gelek heval ji bo ku bingehê jiyaneke rehet ava bikin, bedelên pir giran dan, rojên jiyana xwe kirin diyarî û dane me. Dîsa di qadên civakî de, hevalên weke heval Nagîhan Akarsel, Heval Hevrîn Xelef û pir hevalên ku ji bo azadiya jin xebtîn û jiyana xwe kirin bedel çêbûn. Weke ku wan xwe ji bo me fedakir, emê jî li ser şopa wan bimeşin. Tovê ku heval Sara bi keda xwe ji bo me çandî, emê mezin bikin, bikin şitl û bi tevahiya jinên cîhanê re li dora wê şitlê bi civin. Ji tevahiya jinan re ez serkeftin dixwazim û dibêjim BIJÎ TEKOŞÎNA AZADIYA JIN, JIN JIYAN AZADÎ.
Dîcle Serbilind: Em 8’ê Adarê li Rêber Apo, li gerîlayên serê çiya û li hemû jinên cîhanê pîroz dikin. Bi rêbazên şerê taybet jin tenê di nava malekê de hatiye hêlan, jin bûye amûrekî zarok anînê û girêdayî zilamekî hatiye hêlan. Bêyî ku jin xwe û fikrê xwe nas bike, bêyî ku îrade û cewherê xwe nas bike û tevbigere, tenê di çarçoveyeke teng de hatiye hêlan. Desthilatdariya pergalê û zilam vê rewşê ferz dike li ser jinê. Lewra rojane jin rastî qetlê, îşkence û zextê tên. Pergalê bi vî rengî tirsa xwe di dilê jin de çêkiriye, wê mehkûmî serî tewandinê, bê dengî û koletiyê kiriye. Îro Ji bo her jineke ku bixwazibe bi fikrekî rast xwe nas bike, bibe xwedî hêz, bawerî û cewherê xwe yê neolotîkê bidest bixe, da ku bigihje jiyaneke ku têde mafê wê were parastin zanista jin “Jineolojî” ji bo wan rêçeke. Bi Jineolojî re jin xwe zane dike, xwe perwerde dike. Tiştên ku ava dike, ked di ber dide berhemê wê dibîne. Lewra îro Jineolojî cîhanî bûye. Pêşeroja xwe tamîn kirin navenda xwe zanista jine. Em weke gerîlayên jin jî, tekoşînên me yên di astên herî jor de hatin meşandin û berxwedaniya hatî raberkirin, li ser bingehê pîvanên bîrdoziya rizgariya jin hatine meşandin. Ev jî dibe berhema keda Rêber Apo, wî hêla ku jin xwe nas bike, bi xwe û hêz xwe bawer be, herwiha di tekoşîna azadiyê de ji bo hemû jinên cîhanê pêşeng be. Hereketa jin heya ku gihişte vê astê gelek hevalên me canê xwe kirin bedel. Îro jî bi hezaran dildarê vê riyê hene û şopdarên van hevalan hene. Rol û misyonê me jî dewam kirina rêka wane. Ji bo her jineke ciwan û dildarê azadiyê em dibêjin rêya xwe naskirinê tekoşîna azadiyê ye. Lewra lêgerîn û hewildanên jin pêwîste beriya her tiştî bin, pêwîste bi zanebûn tevgerîn hebe, fêm kirina Rêber Apo û jina tekoşer, jina azadîxwaz kî ye, çiya nas bike. Di dawiyê de em soza tekoşîneke rast meşandinê didin. Em ê her pêşengtiyê ji bo hemû jinên cîhanê bikin.
