Parlamenterê Stenbolê yê DEM Partiyê û endamê Komîsyona Demokrasî, Xwişk-Biratî û Piştevaniya Mîllî ya li Meclîsa Tirkiyeyê ku ji bo çareseriya pirsgirêka Kurd ava bûye Celal Firat, li ser rapora hevpar a ku komîsyon amade bike û helwesta DEM Partiyê ji ANF’ê re axivî.
Celal Firat diyar kir ku partiya wan li ser bingeha pîvanên aştiya civakî, serweriya hiqûqê û siyaseta demokratîk li vê pêvajoyê dinihêre û destnîşan kir ku ew dibêjin, divê komîsyon dûrî perspektîfa dewletê ya yekalî divê bi feraseteke tevgir a bi hemû aliyên dîrokî, siyasî û civakî yê şer rapora xwe binivîsîne.
Her wiha ragihand ku weke DEM Partî ew dibêjin, divê çarçoveya bingehîn a rapora hevpar a komîsyonê bêyî ku li jiberên berê bialiqe, dûrî feraseta ku pirsgirêkê tenê bi tedbîrên îdarî û ewlekariyê bi sînor dike, divê pirsgirêkê bi şênberî dîne holê û got, “Beriya her tiştî divê îradeya çareseriya siyasî û hiqûqî bê destnîşankirin.”
Parlamenterê DEM Partiyê got, “Partiya me cihgirtina pêşniyar û tespîtên li ser tevlîbûna demokratîk, azadiya fikrî, mafê birêxistinbûnê û berfirehkirina qada siyasî ya li nava raporê, her wiha bidawîkirina rejîma bêcezahiştinê, kêfiyetê û kiryarên rejîma îstîsnayî weke pîvanekê dibîne. Ev nêzîkatî di rapora komîsyonê de divê ne tenê nirxandinek be, di heman demê de divê nexşerêyeke diyarker be ku pêşî li dema siyasî û qanûnî ya nû veke.”
Celal Firat anî ziman ku nêzîkatiyên demokrasî, aştiya civakî û xwişk-biratiyê yên ku partiyên li desthilatdariyê û partiyên din ên li komîsyonê heta roja îro anîn ziman, bi giranî hêvî ne û axaftina xwe bi vî rengî dewam kir, “Partiyên navborî xwe nadin ber rûbirûbûna aliyên hiqûqî û siyasî yên pirsgirêkê. Ev nêzîkatî li gorî me nêzîkatiya wê yekê ye ku bi giranî bi çavê ewlekariyê li meseleyê dinihêre, li bêhiqûqiyên heyî napirse û nêrîna bi navenda dewletê ye.”
Lewma jî anî ziman ku raporên partiyên din dûrî kûrahî û wêrekiriya avakirina pêvajoyeke aştiya civakî bûn.
Parlamenterê Stenbolê yê DEM Partiyê Celal Firat got, “Em bi rengekî eşkere dibêjin: Gava destpêkê ya xwegihandina li zemîneke rasteqîn bi wê yekê destpê dike ku her kes qebûl bike ku bi rêbazên ewlekarîperestiyê pirsgirêk çareser nabe. Di karên komîsyonê de her çend nêzîkatiyên cuda hatibin nîşandan jî qebûlkirina mijarên xurtkirina qada siyaseta demokratîk û pêwîstiya bi aştiya civakî kêm jî be derfetê destpêkeke hevpar pêşkêşî me dike.
Weke DEM Partî, ji bo rapora hevpar a bê nivîsandin tenê ji gotinên bi hêvî û nêta baş pêk neyê û em dibêjin, divê rapor gavên diyarker û şênber vebêje. Ji ber vê jî di raporê de di serî de guhertinên li qanûnên TCK, TMK û înfazê divê di raporê de pêwîstiya bi qanûna entegrasyonê ya nû bi eşkere bê destnîşankirin; cih bide pêwîstiya bi berdana girtiyên nexweş û yên înfaza wan hatiye şewitandin, dawî li pêkanînên qeyûman bê anîn.”
Celal Firat diyar kir ku divê komîsyon cih bide wan pîvanan ku garantiyên berfirehkirina mafên siyasî û tevlîbûna demokratîk di nava xwe de vehewîne û dawî li kiryarên kêfî bîne.
Endamê DEM Partiyê yê komîsyonê herî dawî got, “Ev nêzîkatî ji bo partiya me bi wî rengî tê nirxandin ku rapora komîsyonê nebe metneke sembolîk, lê belê bibe nexşerêyek ku pêvajoya demokratîkbûn û aştiya civakî bi pêş ve bibe.”
