Kedkar xwe ji bo 1’ê Gulanê Cejna Karker û Kedkaran amade dikin û dixwazin daxwazên xwe li qadan bînin ziman. Pîrozbahiya li Amedê wê li Qada Stasyonê bi dirûşma “Ji bo civaka demokratîk em bi kedê ber bi azadiyê ve dimeşin” bê lidarxistin.
Ji Komîteya Amadekar a 1’ê Gulanê Hevserokê Şaxê Amedê yê Tum Bel-Senê Mehmet Candan li ser mijarê ji ANF’ê re axivî û anî ziman ku kedkar di roja îro de ne tenê bi xizaniyê her wiha bi krîza debarê re rû bi rû ne. Candan got, “Êdî xizanî ji bo karkernan ne pênaseyek e, rastiya yekser a jiyanê bi xwe ye. Kirê timî zêde dibe, buhayê pêwîstiyên bingehîn zêde dibe.” Candan destnîşan kir ku bi mûçeyê tê dayin têra debarê nake û mirov nikarin pêwîstiyên xwe bi cih bîne. Candan bi dewamî got, “Mirov êdî nikare goşt bikire. Yên ku mehê carekê karibin goşt bixwin xwe bi şens dibînin. Nan, penêr, zeytûn bi xwe jî ji bo gelek malbatan bûye weke luksekê.”
Candan anî ziman ku şerê demdirêj bandor li kûrbûna krîza aboriyê kir û destnîşan kir ku ji bo aramiya aboriyê şert e ku aştî pêk were.
Di vê çarçoveyê de işaret bi Pêvajoya Aştî û Civaka Demokratîk kir û got, “Banga ku beriya 14 mehan hate kirin girîng bû û hêvî afirand. Lê belê li gel dema di ser re derbas bûye jî sererastkirinên hiqûqî nehatine kirin. Pêkanînên qeyûm dewam dike. Li şûna şaredarên hilbijartî qeyûm têne tayînkirin. Ev yek tinehesibandina îradeya gel e. Li girtîgehan girtiyên nexweş hene, mirovên welê hene ku nikarin jiyana xwe bi tena serê xwe dewam bikin. Li gel vê jî nayên berdan. Girtiyên siyasî hîn ragirtî ne. Halbûkî ji bo pêkanîna baweriyê ya di vê pêvajoyê de ev gav diviyabû bihatina avêtin.”
Candan ragihand ku di 1’ê Gulanê ya îsal de ne tenê daxwazên aboriyê wê her wiha daxwazên xwe yên siyasî û civakî jî bi xurtî bînin ziman û got, “1’ê Gulanê roja têkoşînê ya çîna karker a dîrokî ye. Lê belê îsal ji her demê bêhtir xwedî wate ye. Ji ber ku krîza aboriyê giran bûye û daxwazên demokrasî û aştiyê bi xurtî di rojevê de ye.
Em ê di 1’ê Gulanê de daxwazên xwe bi şênberî bînin ziman. Em ê bixwazin ku girtiyên nexweş bêne berdan, girtiyên siyasî azad bibin, kedkarên ji kar hatine dûrxistin li karên xwe vegerin, dawî li pêkanîna qeyûm bê anîn û pêvajoya demokratîk li ser zemîneke hiqûqî bê bicihkirin.”
Lewma jî bang li gel, karker, kedkar, jin, ciwan û hilberîneran kir ku 1’ê Gulanê saet di 12:00 de li Qada Stasyonê beşdarî çalakiya 1’ê Gulanê bibin.
