Koordînatorê Navenda Lêkolînên Siyasî û Civakî (SAMER) Yuksel Genç ê ku li ser nêrîna raya giştî ya têkildarî pêvajoya çareseriyê dixebite, girêdayî lêkolînên qadê ên dawîn nêrîna gel a li ser nêzîkatiya desthilatdariyê ya li hemberî pêvajoyê nirxand. Yuksel Genç anî ziman ku rexneyên veşartî yên Serokê Giştî yê MHP’ê Devlet Bahçelî yên li ser desthilatdariyê û nivîsên Şêwirmendê Serokkomariyê Mehmet Ûçûm yên têkildarî ‘’tasfiyeyê’’, weke du referansên sereke yên pozîsyona AKP’ê ya têkildarî pêvajoyê diyar dikin, tên şopandin. Yuksel Genç destnîşan kir ku di çarçoveya van her du xetan de, li şûna ku desthilatdarî xwedî li pêvajoyê derkeve, helwesteke ku xwe ji berpirsiyariya hevkariyê dûr dixe, nîşan dide û ev helwest her ku diçe kûrtir dibe.
BAWERIYA JI AKP’Ê RE LAWAZ E
Koordînatorê SAMER’ê Yuksel Genç, nêzîkatiya raya giştî ya têkildarî pirsgirêka Kurd nirxand û bi van gotinan helwesta deshilatdariya ya li têkildarî pêvajoyê bê ka di nava civakê de çawa tê fêmkirin, anî ziman: ‘’Di hemû lêkolînên me yên ji destpêka pêvajoyê û heya niha û lêkolîna herî dawiyê ya mehekê beriya niha de, em dibînin ku gelek kes desthilatdariyê guncavî pêvajoyê nabînin. Ji çar însanan bes yek pêvajoyê lihevhatî dibîne; girseyên din pêvajoyê lihevhatî nabînin. Li vir ev yek derdikeve pêşiya me: Desthilatdarî ji destpêkê ve ye pêvajoyê weke pêvajoyeke ‘’terorê’’ dibîne. Desthilatdarî, hemû pêngavên PKK’ê yên erênî yên têkildarî çareseriya şer û pevçûnan weke helwesteke teslîmiyetê pêşkêş dike û li hemberî vê yekê tu pêngavan jî naavêje.Mixabin ku ev yek bêhna însanan tengezar dike û dibe sedem ku baweriya ji desthilatdariyê re çênebe û bi awayekî erênî neyê şîrovekirin.’’
AKP HELWESTA ‘EZ ŞIRÎKÊ QEZENCÊ ME’ HEYE
Yuksel Genç diyar kir ku AKP helwesteke weke ku dibêje ku ez bes şirîkê qezencê me nîşan dide û ev yek anîn ziman: ‘’Te dît du şirîk dest bi karekî dikin û yek ji wan dibêje ku ‘Ez bes şirîkê qezencê me, ne yê zirarê.’ Helwesta AKP’ê jî hinekî wisa pêş dikeve. Civak jî ji ber vê yekê ji aliyê pêvajoyê ve AKP’ê weke ku xwedî li berpirsiyariyên xwe derdikeve, nabîne. Di nava gel de ji aliyê wateya ku ji desthilatdariya heyî tê barkirin ve bêbaweriyeke mezin heye. Gel dibêje ku ger hêza ku desthilatdariyê di destê xwe de digire vê yekê neke, wê demê ev pêvajo wê bi ser nekeve.
Yuksel Genç piştre destnîşan kir ku yek ji sedema bêbaweriya gel pêngavneavêtina desthilatdariyê ye û got: ‘’Girêdayî wesfa pêngavên ku wê desthilatdarî li ser navê dewletê biavêje, helbet gel wê pêvajoyê pêş ve bibe. Gel ji ber ku pêngav nayên avêtin, bawer nakin, ne ji ber ihtimala pêngavavêtinê. Ji ber vê yekê ger pêngav werin avêtin, wê gel zêdetir xwedî lipêvajoyê derkeve û wê pêş bixe. Helwesta Komîsyonê ya neçûna Îmraliyê jî weke helwesteke desthilatdariya AKP’ê tê nirxandin. Ji aliyê raya giştî ve ev yek bi vî awayî tê dîtin û xwendin. Êdî girîngiya çûna Komîsyonê ya ji bo Îmraliyê, wê li gorî encama ku piştî çûnê derdikeve holê, di nava gel de teşe bigire. Ger seredan pêk were, avakirina atmosfereke erênî ya di nava gel de, girêdayî wesfa seredanê û raporan e ku piştre Komîsyon pêşkêşî raya giştî bike. Di navbera wateya ku gel di dema avakirinê de li Komîsyonê bar dikir û girîngiya jêre dihat dayîn û girîngiya wê ya roja îroyîn de ferqek heye. Komîsyonê hîpotezeke ku ew gelekî girêdayî AKP’ê ye afirand. Ji ber vê yekê çûna Komîsyonê ya ji bo Îmraliyê gelekî girîng e.’’
RÊJEYA KESÊN KU DIBÊJIN PKK’Ê YA ZÊDETIR JÎ KIR GELEKÎ BILIND E
Yuksel Genç, girêdayî lêkolînên qadê têkildarî nêzîkatiya PKK’ê ya li ser pêvajoyê û fikra raya giştî ev yek anîn ziman: ‘’Dema ku me lêkolîna dawîn dikir, vekişandina gerîlayan ya ji xeta Tirkiyeyê li holê nebû. Girêdayî vê yekê fikreke civakê jî nebû. Piştre nûçeyên ku gerîla ji Bakur vekişiyane hatin dayîn. Piştre jî hate eşkerekirin ku gerîla ji Zapê vekişiyane. Geşedanên ku PKK berpirsiyariyên xwe yên têkildarî jiholêrakirina ihtîmala şer û pevçûnan bi cih tîne, rû didin. Di nava civakê de rastiya ku PKK’ê Ocalan rol û misyona xwe yali hemberî pêvajoyê bi awayekî serkeftî lîstine, gelekî zêde ye.
Lê belê têkildarî desthilatdariyê ev rêje di vê qonaxê de neguheriye. Lê belê ger desthilatdarî rûnê û egerên gotinên serokê MHP’ê bi cih bîne û gotina Erdogan ya ‘em ê pêvajoyê bilezînin’’ bixe meriyetê, wê demê dibe ku rewş biguhere. Di lêkolîneke me ya mehekê beriya niha de jî di nava civakê de hizra ku PKK’ê û Ocalan rol misyona xwe ya li hemberî pêvajoyê bi serkeftî bi cih tînin, gelekî serdest e. Her wiha rêjeya kesên ku dogotin ku ‘ya zêde jî kirin’ gelekî zêde ye. Lê belê ev yek ji bo AKP’ê derbasdar nîne.
GELÊ KURD NE LI GOTINAN LI PRATÎKÊ DINÊRE
Yuksel Genç di dawiya axaftina xwe de diyar kir ku gelê Kurd girêdayî tecrûbeyên xwe yên beriya niha ne li gotinan li pratîkê dinêre û got: ‘’Beşeke mezin a gelê Kurd weke encameke tecrûbeyên xwe yên berê ne li gotinan li pratîkan dinêre. Her wiha pêngavneavêtina ji aliyê desthilatdariyê ve jî dibe sedem ku di nava wan de bêbaweriyekê derkeve holê. Divê ev yek were zanîn. Tekane guherîna vê rewşê girêdayî pêngavavêtina desthilatdariyê ye.’’
