Di navbera 26-30’ê Îlonê de ‘Kombûna 3’yemîn a Tevgerên Civakî û Gelên Xwecihî yên Mezo Emerîka’ hate lidarxistin.
Konseya Neteweyî ya Rêxistinên Gel û Welatiyên Hondurasê (COPINH) malovanî ji kombûnê re kir ku lîderê wê Berta Caceres sala 2016’an ji aliyê hêzên paramîlîter ve hate qetilkirin. Nûnerên Tevgera Azadiyê ya Kurdistanê jî beşdarî kombûnê bûn.
Di kombûnê de ku çar rojan dewam kir, qala girîngiya konfederalîzma demokratîk a li seranserê cîhanê hate kirin û girîngiya piştevaniya navneteweyî ya di têkoşîna hevpar de hate destnîşankirin.
Bi pêşengiya jinên ji COPINH’ê û nûnerên Tevgera Jinên Kurd bi sernavê “Heta jin azad nebe civak azad nabe” atolyeyek hate lidarxistin û tecrûbeyên li ser têkoşîna azadiyê ya jinê hatin parvekirin.
Di encamnameyê de hate ragihandin ku bi têkoşîna diyarkirina çarenûsa xwe ya gelê Kurd re têkiliyeke xwişk-biratiyê hatiye danîn û daxwaza azadiya “Rêberê dîrokî yê gelê Kurd Abdullah Ocalan” hate kirin.
Beşdaran diyar kirin ku Berta Caceres gelê Kurd û têkoşîna Rêber Apo da naskirin û gotin, “Xwedîderketina li têkoşîna gelê Kurd xwedîderketina li wasiyeta Berta ye.”
Ji Panama, Kosta Rîka, El Salvador, Meksîka û Gûatemalayê gelek delege beşdarî kombûnê bûn.
Di dawiya kombûnê de delegeyan dîmenekî hevpar parve kirin û piştevaniya xwe ya bi gelê Kurd re nîşan dan.
Di şeva çandê de jî dans û muzîkên ji gelên cuda hate nîşandan. Her wiha li ber stranên Awazê Çiya govend hate gerandin.
