Gerîlayê HPG’ê Cengîn Welat têkildarî “Banga Aştî û Civaka Demokratîk” a ku Rêber Apo di 27’ê Sibatê de ragihand û Newrozê de ji ajansa me ANF’ê re axivî. Cengîn Welat destpêkê Newrozê li Rêber Apo û tevahî gelên bindest pîroz kir û wiha qala girîngiya Newrozê kir: “Eger em salnameya Kurdî binêrin wê bê dîtin ku Newroz bi çi awayî tê pîrozkirin. Di salnameya Kurdî de tê gotin ku 1’ê Adarê weke destpêka saleke nû tê pêşwazîkirin. 1’ê Adarê weke hatina biharê û nûbûna xwezeye tê zanîn. Bi destana Kawayê Hesinka re ev roj weke rojekê rizgariyê tê pîrozkirin. Serkeftina Kawayê Hesinkar hişt gelê Kurd heta niha Newrozê weke rojekî berxwedanê pîroz bikin.”
‘HEVAL MAZLÛM BAWERIYA KURDAN ZINDÎ KIR’
Gerîla Cengîn Welat anî ziman ku hevrê Mazlûm Dogan roja Newrozê bi çalakiya li hember hêzên desthilatdar ev roj watedartir kir û wiha domand: “Çawa ku Kawayê Hesinkar li hemder Dehaq bi ser ket, heval Mazlûm jî bi gotina ‘Berxwedan jiyan e’ li hember Dehaqên hemdem bi ser ket. Heval Mazlûm baweriya Kurdan a azadiyê ji nû ve zindî kir. Ji bo wê jî Newroz ji bo me nasnameya serkeftinê îfade dike. Gelek bedelên giran hatin dayîn lê ti carî ev agir venemirî. Bi saya lehengan agirê Newrozê gur û geş bû.”
‘RÊBER APO ÎLHAMA AZADIYÊ DAYE GELAN’
Gerîla Cengîn Welat got ku herî zêde yê ku giringiyê dide van rojan Rêber Apo ye û ev tişt got: “Gelê Kurd bi saya Rêber Apo di nav cîhanê de bûne xwedî hêzêke stratejîk. Hem di milê siyasî hem jî di milê leşkerî de di cîhanê de rolekî girîng dilîze. Aştî û Civaka Demokratîk a ku Rêber Apo pêşxistiye ji bo gelê Kurd bûye îlhama azadiyê. Tenê ne ji bo gelê Kurd ji bo tavahî gelên bindest jî bûye riya azadiyê. Rêber Apo hemû pêngavan di roja Newrozê de bi pêş xistiye. Ji ber vê Newroz ji bo me pir girîng û watedar e. Rêber Apo bi hezaran Kawayên Hemdem avakiriye. Kawayên Hemdem îro çiyayê Kurdistanê kirine keleha berxwedanê û gelek ji wan jî canê xwe feda kirine.
BI HEZARAN EGÎD LI ÇIYAYÊN KURDISTANÊ NE
Her wiha Newroz weke Hefteya Lehengiyê tê pênasekirin. Şehîden ku di vî meha pîroz de canê xwe bexşandine ji bo me bûne nexşeriya ku em karbin li ser bimeşin. Eger em vê rojê bi bîr bînin, divê bi taybet fermandarê mezin Mahsum Korkmaz (Egîd) bi bîr bînin. Hevrê Egîd di vê mehê de şehîd bû. Şehadeta heval Egîd bû wesîleya ku bi hezaran Egîd li çiyayên Kurdistanê derbikevin. Eger em xwedî li vê roja pîroz derkevin pêwîste despêkê em xwedî li şehîdên xwe û çanda xwe ya dîrokî derkevin. Ez jî weke gerîlayekî azadiyê her tim şopdarê şehîdên doza azadiyê bim û bedela wê çi dibe bila bibe em ê xwedî li çanda xwe ya pîroz Newrozê derkevin. Li ser vî esasî ez dîsa Newrozê li tevahî şehîdên şoreşê û gelê me yê welatparêz pîroz dikim. Em ê bi Rêberê azad re Newrozê bi serketinê tacîdar bikin.”
