Şêniyên Şengalê tevî saziyên Rêveberiya Xweser a Şengalê û gelê Ereb, bi pêşengiya TAJÊ meşiyan. Di meşê de bang li dewleta Iraqê hate kirin ku şervanên YBŞ’ê yên girtî, bên berdan.
Meş ji ber avahiya şaredariya gel a Sinûnê destpê kir û heya Dewra Şehîd Mam Zekî dewam kir.
Di meşê de pankartên ‘’Em ê xwepêşandanên xwe bi domînin heya ku zarokên me neyên berdan’’, ‘’Azadî zarokên me re û em bi zarokên xwe re ne’’ hatin hildan. Her wiha dirûşmeyên ‘’Gel û şervan yekin’’ û ‘’Bijî berxwedana YBŞ’ê’’ hatin berz kirin.
Piştî meş gihişt cihê dewra Mam Zekî, daxuyanî hate dayîn.
Daxuyanî ji aliyê Hevserokê MXDŞ’ê Nayîf Şemo ve bi zimanê Erebî hate xwendin.
Di destpêka daxuyaniyê de ev tişt hate gotin: ‘’Em weke gelê Şengalê bi Êzidî û Erebên xwe ve bi vê daxuyaniyê rewşa ku îro li Şengalê di qewime, radixin ber çavan.”
Di daxuyaniyê de hate destnîşankirin ku di sala 2014’an de gelê Êzidî tevî ku bê çek jî bû, li hemberî rêxistina herî metirsîdar a li cîhanê şer kir û axa Şengalê bi xwîna xwe ya paqij ji wan rizgar kir.
Di daxuyaniyê de ev bang hate kirin: ‘’Li ser vî esasî em bi vê daxuyanî bang li Serokwezîrê Iraqê dikin, em ê heya azadiya her 5 hevalên xwe ku ji 20’ê vê mehê ji aliyê artêşa Iraqê ve girtî ne, li ser piyan bin û dev ji çalakiyên xwe bernedin. Em bi hêvî ne ku serokwezîrê Iraqê guh bide banga me, ji bo aşatî û aramî were hemû herêmên me yên Şengalê.”
