Gerîlaya YJA Starê Lînda Xeyrî Hecî (Cîhan Hîvron) û hevrêyên wê yên li Heftanînê şehîd bûbûn, li komelgeha Xanesorê bi awayeke girseyî hatin bibîranîn. Malbatên şehîdan, şervanên YBŞ-YJŞ’ê, saz û rêxistinên girêdayî Rêveberiya Xweser a Şengalê, TAJÊ û malbata gerîla Cîhan Hîvron tevlî merasîmê bûn.
Merasîm bi deqîqeyek rêzgirtinê hate destpêkirin û paşê dayikên şehîdan find vêxistin. Di merasîma şehîd de peyama HPG’ê ya ji bo malbata şehîd û daxuyaniya derbarê şehîdan de hate xwendin. Bi navê girseya ku li wir kombûye û TAJÊ dayê Şemê Remo axivî.
Destpêkê bi navê YJŞ’ê Sozdar Şengalî axivî. Sozdar Şengalî şehîd Cîhan Hîvron bi van gotinan bibîranî û got: “Heval Cîhan di temenek ciwan de berpirsyariyên mezin girt ser milê xwe. Di sala 2017’an de roleke pêşeng girt ser milê xwe û berê xwe da çiyayên Kurdistanê. Ew li ser şopa Bêrîvan û Arînan meşiyan. Ew bû pêşengek ciwanên Êzidî.”
Piştre bi navê TAJÊ dayê Şemo Remo jî got ku hinek dibêjin keçên Êzidî nikarin bibin leşker û got: “Nimûneyên me yên weke Zarîfe Oso hene. Niha em ji bi saya van keç û xortên Êzidî parastîne û parastina civaka me heye. Her keçek me ku çûye û çek hildaye, ji bo me cihê serbilindiyê ye. Îro em bi saya van keçên xwe dikarin li her derê doza mafê xwe bikin.”
Xwîşka şehîd Lînda, Lînza Xeyrî jî di merasîmê de bi navê malbatê axivî û vê peyamê da: ‘‘Xwîşka min bihêzbû, xwedî îradeyeke ji pola bû. Wêrek bû û xwedî dilekî mezin bû ku karî xwe feda bike. Ew xwe ne tenê ji bo Şengalê, ji bo hemû mirovahiyê feda kir. Xwişka min di xeta Bêrîtan de meşiya û bû hevala wê. Dema dewleta Tirk a faşîst êrîşê wan kir, ew û hevalên xwe li ber xwe dan, teslîm nebûn. Em pê serbilind in. Xwişka min, rêya min ronî dike.”
Lînza Xeyrî sersaxî ji malbata şehîd Ozgûr û Şehîd Sarya re jî xwest û axaftina xwe wiha bi dawî kir: ‘‘Em ji wan re dibêjin, bila dilê wan rehet be, em ê xeyalên wan pêkbînin. Em ê şopdarên wan bin. Ancax mirovên wek van bikarin hezkirina welat di dilê xwede mezin bikin û xwe feda bikin. Ez sersaxî ji Rêber Apo û hemû hevalan re dixwazim, dibêjim Cîhan şehîda we ye û paşê ya me ye.”
Piştre merasîm bi nîşandana sînevîzyonek li ser şehîd Cîhan Hîvron û dirûşmeyên, ‘Şehîd namirin’ bi dawî bû.
