Starta Newroza ku wê ji aliyê Komîteya Amadekar a Newroza Êlihê ve bi şîara “Rêbertiya Azad Civaka Demokratîk” û “Ji bo Azadiyê Newroza Civakî ya Demokratîk” bê lidarxistin, bi tevlîbûna hezaran kesî li Taxa Korik hate dayîn. Pîrozbahiya Newrozê li qada taxê hate lidarxistin û gelek ciwan tevlî bûn. Di pîrozbahiyê de tim û tim dirûşmeyên “Bijî Serok Apo”, “Bê Serok jiyan nabe”, “Jin jiyan azadî”,”Ciwan fedaiyên Apo ne”, “Em ê bi berxwedanê bi ser bikevin” û “PKK gel e, gel li vir e” hatin berzkirin.
Piştî deqîqeyekî rêzgirtinê agirê Newrozê hate pêxistin û girse li dora agirê bi gerandina govendê, sirûda “Çerxa şoreşê” xwend. Girseyê bi çepik, tilîlî û dirûmeyan xwe ji ser agir avêtin.
Li vir Hevşaredara Êlihê Gulîstan Sonuk ku erka wê hate desteserkirin, axivî. Sonuk bal kişand ser dîroka berxwedanê ya gel û bang kir ku aştiya bi rûmet bi hev re ava bikin.
Hevşaredar Êlihê ya DEM Partiyê Songul Korkmaz jî diyar kir ku agirê Newrozê ji bo aştiyekî birûmet hatiye pêxistin û got ku Newroza îsal wê bibe Newroza azadiyê.
Hevberdevkê Komîteya Amadekar a Newrozê û Hevserokê DEM Partî yê Êlihê Mustafa Mesut Tekik jî wiha got: “Manîfestoya 27’ê Şibatê, manîfestoya azadî, wehevî û aştiyekî birûmet e.”
Piştî axaftinan bi hezaran kes li dora agirê Newrozê li hev civiyan û bi dirûşme, çepik û tilîliyan govend gerandin.
