Komeleya Alîkarî, Piştevanî, Yekîtî û Çandê ya bi Malbatên ku di Dergûşa Şaristaniyê de Xizmên Xwe Winda Kirine re (MEBYA-DER), Zinar Firat (Bariş Coşkûn) ê gerîlayê Hêzên Parastina Gel (HPG) ê ku di sala 2016’an li Lice ya Amedê şehîd bibû, di 10emîn salvegera şehadeta wî de li avahiya komeleyê bi bernameyekê bi bîr anî. Bibîranîn bi xwendina mewlûdê dest pê kir û pişt re Hevserokê MEBYA-DER a Egeyê Mîkaîl Atan û birayê Zinar Firat, Halîl Coşkun axivîn.
‘DIVÊ EM NE RAWESTIN, AVA BIKIN’
Mîkaîl Atan da zanîn ku li her bihosta Kurdistanê berdêl hatine dayîn û diyar kir ku pêvajoya îro bi pêşengiya Rêber Apo, Kurd ji aliyê cîhanê û dewletên mêtinger ve hatine naskirin û anî ziman ku armanca bikaranîna çekan a Tevgera Azadiya Kurdistanê jixwe naskirina Kurdan a li cîhanê bû û wiha pê de çû: “Ji niha û pê de jî Kurd dê bi siyaseta demokratîk azadiya xwe ya ava bikin. Ji bangawaziya Rêberê Gelê Kurd Abdullah Ocalan a 27ê Sibatê û vir ve, çav li gavên dewletê ne. Mînak em diçin ku derê ji me tê pirsîn çima dewlet gavan navêje. Lê divê were zanîn ku tiştê em li bendê ne, tenê çend qanûn û pakêtên darazê nînin. Em dizanin ku meseleya Kurd pirsgirêkeke hiqûqî ya bingehîn e û hewcedarî bi guhertineke bingehîn heye, ev jî tenê gava ku em hemû xwe berpirsiyar bibînin pêkan e. Divê her kes di vî warî de însiyatîfê bigire, bikeve tevgerê da ku em bikaribin behsa aştiyek û pêvajoyeke rasteqîn bikin. Divê em ji hêsankariya ku her tiştî ji dewletê dixwaze, dûr bikevin. Di vê pêvajoyê de divê em komunan ava bikin, meclîsan çêbikin, bi kurtasî divê em xwe bi rêxistin bikin. Divê çavên me li Enqereyê nebin, divê çav û guhên me li ser gelê me bin. Em soz didin şehîdên xwe, azadiya Rêber Apo û hemû girtiyan nêzîk e.”
‘BERXWEDANEKE DÎROKÎ NÎŞAN DAN’
Birayê Firat Zinar, Halil Coşkun jî anî ziman ku axaftina li ser şehîdan mijarekî giran û kûr e û got: “Hemûyan bi qehremanî li ber xwe da, ji bo vî gelî berxwedaneke dîrokî ya wisa nîşan dan ku bû mijara destanan. Eger îro em behsa pêvajoyekê dikin, ev bi xêra şehîdên me ye. Şehîd namirin.”
