Gerîlayên HPG’ê yên li çiyayên Kurdistanê li dijî artêşa Tirk a dagirker li ber xwe didin, berxwedana li Bendava Tişrînê silav kirin ku du meh in li Rojavayê Kurdistanê dewam dike.
Ji gerîlayên HPG’ê Rûbar Gabar û Demhat Qamişlo berxwedana gelan a li dijî êrîşan pîroz kirin. Gerîla Demhat Qamişlo şehîdên berxwedana Tişrînê bi hurmet û minet bi bîr anî û destnîşan kir ku berxwedana weke mînaka şerê gel ê şoreşgerî dikare bê nîşandan.
‘GELÊ ME JI MIRINÊ MEZINTIR E’
Gerîla Demhat Qamişlo got, “Ez gelê me yê li Rojava li ber xwe dide silav dikim, ji birîndaran re şîfayê dixwazim. Şervanên QSD’ê û hunermendan jî silav dikim ku li hemberî teknîk, tank, top û çeteyên dijmin li ber xwe didin.
Em bi gelê xwe re ne. Em jî li vê derê li ber xwe didin. Ji ber ku dixwazin hêjayî Rêber Apo bin. Qada cengê ye. Weke ku gelê me got, em ji mirinê mezintir in. Em gelê xwe silav dikin ku ji mirinê hîn mezintir e. Em ji gelê xwe bawer dikin û deyndarê gelê xwe ne. Em li çiyayên Kurdistanê, gelê me jî li bajaran li dijî dagirkeran şer dikin, li ber xwe didin. Eger em dest bidin hev em ê teqez bi ser bikevin. Ji ber ku ev şerê gel ê şoreşgerî ye. Dagirker hewl bide gelê me bitirsîne jî gelê me heta dawiyê bûye mertalên zindî. Û li dijî artêşa Tirk disekine. Ev heqîqetek e û her kes dibîne.” Gerîla Demhat diyar kir ku gelê Kurd gelê beriya 100 salî nîne, hatiye guhertin û xwe bi rêxistin kiriye.
‘DEWLETA TIRK BI POLÎTÎKAYA XWE DIXWAZE GELAN BIKE DIJMINÊ HEV’
Gerîlayê HPG’ê Rûbar Gabar jî berxwedana ciwanên Kurd û Ereb silav kir ku li hemberî êrîşên çeteyên DAÎŞ’ê yên dewleta Tirk li ber xwe didin.
Gerîla Rûbar Gabar got, “Gelê me zêdeyî du meh in li Bendava Tişrînê li ber xwe dide. Mînakeke gelekî baş a Şerê Gel ê Şoreşgerî nîşan dide. Li hemberî tank, balafir û topên dewleta Tirk li ber xwe didin. Li gel bombardûmana bi balafiran jî gelê me gavek bi tenê bi paş ve neavêtiye, divê neavêje. Weke gerîlayekî Ereb, weke gerîlayekî Ereb ê li çiyayên Kurdistanê şer dike, ez li pişt gelê xwe me û piştgiriyê didim.
Divê gelê Ereb hîn bêhtir pişttigiriyê bide gelê Kurd; bi ruhê hevpar azadiyê bi dest bixin. Gelek Eşîrên Ereb li dijî desthilatdariya dewleta Tirk in, em vê yekê silav dikin. Dewleta Tirk polîtîkayên şerê taybet dimeşîne ku herdu gelan bike dijminê hev. Divê nekevin vê xefikê. Em li vir in û li pişt gelê xwe ne. Em deyndarê gelê xwe ne. Serketin wê ya gelê me be. Bi vê wesîleyê sersaxiyê ji malbatên şehîdan, şîfayê jî ji birîndaran re dixwazim.” Gerîla Rûbar Gabar berxwedana gel silav kir.
